SALMOS 47:2-9

²Pampa TOTECO yaya cati más hueyi huan temajmati. Yaya nopa hueyi tanahuatijquet cati quinahuatía nochi ni taltipacti.

³Quintzontamilti pilaltepetzitzi toixpa huan quitalijtoc nochi talme tomaco para tiquinnahuatise. Yeca tojuanti tahuel tipaquij.

⁴Yaya quitapejpenijtoc ni tali para techaxcatis. Techmaca cati más cuali pampa techicnelía tojuanti tiimasehualhua.

⁵Toteco Dios tejcotoc campa tanahuatía. Nochi tzajtziyayaj ica paquilisti huan tapitzayayaj ica tapitzali quema TOTECO calajqui.

⁶Xihuicaca tiohuicat para tijpaquilismacase Toteco Dios. Xijhuicatica pampa yaya totanahuatijca.

⁷Toteco Dios, yaya nopa tanahuatijquet cati quinahuatía nochi ni taltipacti. Xijcualtalica se huicat cati cuajcualtzi huan xijhuicatica.

⁸Toteco Dios mosehuijtoc ipan isiyaj tatzejtzeloltic, huan tanahuatía ipan nochi talme.

⁹Nopa huejhueyi masehualme cati quipiyaj tanahuatili ipan campa hueli tali ipan ni taltipacti mosejcotilíaj tohuaya. Quinequij para san sejco tijhueyichihuase Toteco Dios, yaya cati iTeco Abraham cati huejcajquiya itztoya.