Salmos 40:2-11

²Bebéaje̱' neda' ca tu lu xe̱dxu situj, ne lu da naca ca guna' guzra'. Bzue̱' ni'a ca tu lu xiaj xre, ne begu'e̱ neda' neza li.

³Be̱ne̱' dxul-la' tu da cube da naca na da dxue lá'ana' Xránadxu. Benne' zante̱ xelelé'ene̱' da nigá dxune̱', na' xelezrebe̱' Le̱', ne xuluxrén lazre̱' Xránadxu Dios.

⁴Ba neza zrente̱ naca na chee̱ bénnea' dxuxrén lazre̱' Xránadxu Dios, ne quebe dxune̱' ca dxelún benne' ca' dxulucá'ana szrene̱' bedáu' xiaj xaga ca', ne quegá ca dxelún benne' ca' dxelún lazre̱'.

⁵Da zante̱ be̱nu', Xrana' Dios, da dxebánentu', ne ca zaj naca da dxezá lazru' gunu' chee̱ntu' quebe gaca gulábantu' lau Lue'. Chela nu guzenda' ca zaj naca na, ne che guchálaja' chee̱ na, quebe baben tu na.

⁶Quebe dxezaca ba lazru' béadu ca' gutia' lau', u da gunna' Lue', ne quebe gunabu' béadu ca' guzézxea' lau', u dxen chee̱ béadu ca' da guzúa' lau' ne̱ chee̱ dula nabaga', san gusálaju' naga' chee̱ xenda' chi'u.

⁷Nadxa gunnía': Guná' xque, za'a neda'. Lu xiche lá'azxa naxúaj na ca naca chia'.

⁸Dxezaca ba lazra' guna' ca da dxaca lazru' Lue', Dios chia', na' da nadxixruj be'u zua na lu xichaj lázrdawa'.

⁹Ca naca da xrlátaje chiu' ba bzenda' bénneache naga zaj nazraga chiu' bénneache zante̱. Gunná' xque, quebe guzúa zria', ca nézqueznu' Lue', Xrana' Dios.

¹⁰Quebe bcácheza' ca da xrlátaje chiu' lu lázrdawa'. Ba bchálajqueza' ca naca xel-la' li lazre' chiu', ne ca dxuseláu' bénneache. Quebe guzúa' zri ca naca xel-la' dxexache lazre' chiu', ne ca naca da li chiu' ládujla benne' zante̱ zaj nazrague̱' chiu'.

¹¹Xran, quebe chenu' xexache lazru' neda'. Xel-la' dxexache lazre' chiu', ne da li chiu' tu dxelácale̱zqueze na neda'.