Psalm 40:2-11

²Ngayuluṉa tjuḻpirpangka kaṟalukatingu ngaṯi puḻkangka mununa puṯu pakaṟa nguwanpa ilungu, kaṉi nyuntu mantjiṟa apu waḻungka tjunu wankaṟu rapa ngaṟanytjaku.

³Munuṉin nyuntu inma kuwaritja nintinu inkara nyuntunya waḻkuntjaku. Kaya aṉangu tjuṯangku nyuntu palyantja nyakula kulilku, “Munta-uwa, mulapa Godanya witulya puḻka nyinanyi.” Munuya palulanguṟu nyuntumpa mulamularingkuku.

⁴Mayatja God, aṉangu panya nyuntumpa mulamularingkupai pukuḻpa mulapa nyinaku. Aṉangu nyanga palu puṟunypa panya kaṉany-kaṉanypa nyinapai tjuṯangka puṯu tjunguringkupai. Munu palumpa tjanampa god ngalypa-ngalypa tjuṯa tjunguringkula waḻkulpai wiya.

⁵Mayatja God, nyuntu puḻka mulapa nganampa palyaṉu kutjupa kutjupa wiṟu tjuṯa. Ka nyanga palu puṟunypa kutjupangku puṯu alatjiṯu palyalpai. Ka panyan piṟuku wiṟu tjuṯa palyantjikitjangku kalkuṉu. Uwa nyuntu palyantja winki mulapa ngaṟanyi, kaṉa puṯu nguwanpa uwankara tjakultjunkuku nyuntu panya palyantjitja tjuṯa.

⁶Tjinguṟuṉa puluka munu tjiipi ngalya-katira pungkula tiliwakaṟa nyuntunya ungama ngayuku kalyparingkunytjaku, palu nyuntu mukuringkunytja wiya ngayulu nyanga alatji palyantjaku. Panya nyuntu ngayunya pina palyaṉu nyuntunya wangaṉarangku kulintjaku.

⁷Kaṉa nyuntula wangkangu, “Nyangatjaṉa ngayulu pitjangu, panya iriti nyuntu nyiri miḻmiḻṯa walkatjunu tjukurpa ngayunyatjara.

⁸Uwa Mayatja God, ngayuluṉatju puḻkaṟa pukuḻaripai nyuntu mukuringkunytjitja tjuṯa palyantjikitja, panya ngayuluṉa nyuntumpa tjukurpa kurunpa winkingku tiṯutjarangku kulilpai.”

⁹Ka panya nyuntumpa walytja tjuṯa nyuntunya waḻkuntjikitja tjunguringangi, kaṉa tjanala tjakultjunangi panya nyuntu palyantja uwankara tjukaṟuru alatjiṯu. Nyuntu ninti Mayatja, panya ngayulu nyuntunyatjara rawangku wangkapai wantinytja wiyangku.

¹⁰Ngayuluṉa aṉangu tjuṯangka tjakultjunangi panya nyuntu ngayunya mulapa alatjiṯu wankaṟunu. Alatjiṉa tjanala wangkangi, “Nganampa mayatjangku nganaṉanya ngaḻṯunytjungku kanyilpai tiṯutjarangku. Panya paluṟu kalkuntjatjanungku palyalpai alatjiṯu.”

¹¹Mayatja God, wanyutju tiṯutjara ngaḻṯunytju ngaṟama. Munuṉi wankaṟu kanyinma panya nyuntun tiṯutjarangku mukulyangku aṯunymankupai, munu panyan kalkuntjatjanungku palyalpai alatjiṯu.