SALMOS 38:2-13

²Miyac nechcocohua cati amo cuali nijchijtoc. Eltoc quej nochi mocuataminhua calactoc ipan na. Quena, eltoc quej techajsitoc, pampa nijmati ticualani ica na.

³Huan pampa ticualani pampa nitajtacolchijtoc, nijmati quenicatza nochi notacayo mococohua. Yon se noomiyo amo cuali eltoc.

⁴Nochi notajtacolhua huetztoc nopani. Eltoc quej nimisahuisquía campa miyac at. Notajtacolhua eltoc quej se tamamali tahuel etic cati amo hueli niquijyohuía.

⁵Palani notacayo pampa nijchijqui se huihuiyot. Mijyotíaj nococohua.

⁶Nicuitapanhuitoltic huan amo hueli nijtanana notzonteco. Semilhuit nichocatinemi por cati nijchijtoc.

⁷Nochi notacayo tiquisa. Huan ya tantinemi nochicahualis por notajtacol.

⁸Nimomati quej nitatejtejtzonti. Yon quentzi fuerza amo nijpiya. Nelía niaxti ipan noyolo.

⁹NoTeco, ta tijmati quenicatza nijnequi sempa niitztos cuali moixpa. Nochi cati nimoilhuía tanemijya nesi moixpa. Amo teno hueli nimitztatilía.

¹⁰Noyolo nelhuihuipica, huan ya tantinemi nochicahualis. Ayecmo hueli nitachiya cuali.

¹¹Nonelhuampoyohua huan noteixmatcahua san nechhuejcaitaj, pampa quiijiyaj nococohua.

¹²Inijuanti cati quinequij nechmictise quisencahuaj taquetzti para nechmasiltise. Cati quinequij nechcocose talojtzitzi nechilhuíaj quenicatza nechtzontamiltise. Semilhuit quitemohuaj quenicatza nechcajcayahuase.

¹³Pero na nimochihua quej amo nijcaqui cati quiijtohuaj. Nimochihua quej se cati amo hueli camanalti huan amo nijtapohua nocamac para niquinnanquilis.