Salmo 38:2-13

²Henduen be te mibpanà a kenikew wey midlepadu te mesakit.

³Tenged te kegkepauk nu te kebpekevaal ku te menge salà, ne kenà meupiya is kegezamgezam ku kayi te lawa ku.

⁴Henduen be te egkelened ad te menge salè ku, iring heini te meveǥat he uwiten he kenè ku egkehenat.

⁵Tenged te kezuzupangi ku, nengeredak is menge palì ku ne mibmemahù.

⁶Egkevekut e en te utew ku kegkesekiti, ne tivuuk he andew is kedlalew ku.

⁷Ne kenà meupiya is kegezamgezam ku kayi te tivuuk he lawa ku su ed-al-al is peka ku.

⁸Ne utew e en meluya. Ebpekezag-es a tenged te mesakit he egkeǥezam ku.

⁹Nengazen, netuenan nu is langun he penganduy ku he meulii a, wey nezineg nu is kedag-es ku.

¹⁰Ebpekehuyab is kumeng ku; wazè ku en desen, ne kenè e en utew ebpekaahà.

¹¹Midlikayan ad te menge emiǥu ku wey menge zuma ku tenged te zaru ku. Minsan is menge kezuzumahi ku ne mibpekeziyuan e zan en.

¹²Edtuǥesen a te menge etew he egkesuat he edhimatey kedì. Ne sikan is egkesuat he ebpaantus kedì, midhisgutan dan is paaǥi te kedezeeti zan kedì. Tivuuk he andew is kebpelanu zan te kedluib kedì.

¹³Mibpevevengel e zà wey mibpeeemew he henduen be te kena a ebpekezineg wey ebpekekaǥi.