SALMOS 35:9-23

⁹Huajca quena, na nipaquis ipan TOTECO. Nijpiyas paquilisti pampa TOTECO nechmaquixtijtos.

¹⁰Ica nochi noyolo niquijtos: “Amo aqui seyoc quej ta, TOTECO. Tiquinmocuitahuía cati amo quipiyaj fuerza para masehualme cati tetique amo teno huelis quinchihuilise. Quena, tiquinmanahuía cati teicneltzitzi huan cati amo quipiyaj cati quinpolohua. Tiquinmanahuía inimaco cati quinequij quintacuijcuilise.”

¹¹Motananaj masehualme cati amo cuajcualme huan nechcualancaitaj. Inijuanti quitestigojquetzaj cati amo melahuac, huan nechtaijilhuíaj ica tamanti cati amo nijmati.

¹²Nechtaxtahuíaj ica cati amo cuali, masque nelcuali niquinchihuilijtoc. San quinequij nechtequipacholmacase.

¹³Pero quema inijuanti mococojque, nimotequipacho inihuaya huan nimoyoyonti ica nopa fiero yoyomit para nochi quimatise nimotequipachohuayaya inihuaya. Hasta nimosajqui por inijuanti para nijtajtanis TOTECO ma quinchicahua. Pero TOTECO amo quicajqui cati niquilhui.

¹⁴Nimotequipachojtinemiyaya quej se tamanti fiero ipantitosquía se nohuampo o se noicni. Nimotequipacho huan nichocatinemiyaya quej mictosquía nonana.

¹⁵Pero quema na nechajsic tequipacholi, inijuanti pajque. Quema nimotepotani huan nihuetzqui, inijuanti mosentilijque huan nechhuetzquilijque. Masehualme cati amo cuajcualme huan cati nechixmatiyayaj nechejelnamiquiyayaj huan nechmaquiliyayaj masque amo teno nijchijtoya.

¹⁶Quej masehualme cati amo cuajcualme quihuetzquilíaj ten hueli, inijuanti noca pajque huan motancochhuehuechotzque noixpa ica cualanti.

¹⁷TOTECO, ¿hasta quema noja san tijtachilijtos nochi ni tamanti? Techmanahui para amo nechmictise, pampa san setzi nonemilis. Techmaquixti ten ni masehualme cati mochihuaj quej tecuanime cati quinequij nechhuejhuelose.

¹⁸Huan nimitztascamatis miyacapa ipan tasentilisti. Iniixpa nochi nopa miyaqui momasehualhua nimitzpaquilismacas.

¹⁹Amo xiquincahuili nocualancaitacahua cati istacatij ma noca paquica. Amo xiquincahuili cati nechcualancaitaj ma moixijcopilica ica paquilisti noixpa por notequipachol.

²⁰Inijuanti amo quitemohuaj tasehuilisti. San moilhuíaj quenicatza huelis quincajcayahuase masehualme cati itztoque ica cuajcualtzi ipan ni tali.

²¹Nechtaijilhuíaj huan quiijtohuaj: “¡Xiquitaca tijnelitztoque cati fiero quichijqui!”

²²TOTECO, ta tiquitztoc cati quichihuaj. Amo san xiitzto huan amo teno tijchihuas. ¡Amo techtahuelcahua!

²³Ximotanana huan techchihuili cati xitahuac huan melahuac. Quena, TOTECO, xiisihui huan techmanahuiqui.