GWAY GI IDAWUU’D 35:9-23

⁹Dhali yan’ko’d aḵashiram pem ’kunya bwa e Tap̱a mo mmoyuḵ gway mmomaŋa maŋ gom mony’cuḵ piti mo.

¹⁰Arisa simam pem mini o gwo mo ki: Ayy Tap̱a, kaja a’di jin waki /e mo, /e jin ’cuḵ a’di jin ’ka’da is ki ’ka’d mo ’peni a’di jin ’bitha’bi’th gom a’di mo, dhali a’di jin ’ka’da is dhali a’di jin midi mii ta gi to mo ’peni a’di jin shi/ki a’di is mo.

¹¹Iman/o gwo kun dup̱una dup̱i e mo tani uni cuki mis ap̱o/ aha/ mo. Uni doṯki aha/ to kun ’koka/ ki mish ’ban mo.

¹²Uni ki c̱i aha/ tonthus ka nyaŋ’ko’d gom tom ’borga/ kun miiga/ gom uni mo. Aḵashiram pem a’di ’bushura/ ’bushur mo.

¹³Hili aha/, ki uni ’ba’thkin mo tani – aha/ hi’thkina burrinyen shawaal mo, aha/ shi/kina is pem ki moŋga/ to mo. Aha/ ’thokina ki ’kup̱ pem jin karka/ ka luŋgu’b abor pem mo

¹⁴me’d jin jwakaṯkunu aha/ adu goma mugum pem mo dhala kam pem mo. Aha/ yakina ka kul is me’d jan ṯal ’de/ jin gwoki’d goma ta’dam piti mo, mmobiṯ ’kup̱ ka luŋgu’b dhali ko ki gwony jabu’th mo.

¹⁵Hili e mombiṯ pem mo tani uni tulki is mo mmop̱e’th ki ḵuss ḵuss mo, uni tulki is mmonṯal ’de/ ap̱o/ aha/ mo. Uni kun ta ŋwol kun molka/ mo tani thu’thki aha/ ’pen ki dar gi mondaḵ mo.

¹⁶Uni c̱i aha/ ṯinya/ ka maḵ mo ki nyanye/ dhali ki nyanye/ mo. Uni ’pe’dki aha/ shem buni i is mo.

¹⁷Kakasja, ayy Tap̱a, mina /e c̱a’bi gu is mo kan? ’Cwami aha/ mo ’peni mo ma bujur buni kun ’ce’du sho’k mo, mondiki/em pem ’pena risa dhop̱ mo.

¹⁸Dhali yan’ko’d aha/ mina c̱i /e mom’bor bwa i is e bwaman ma waambuhany ’kwani mo. Dhali e mom’bi’th ma waambuhany ’kwani mo tani aha/ mina maŋ /e mo.

¹⁹Dhalku/ ki dhal uni gwansan bway mo mmo’kuny bwa ap̱o/ aha/ mo uni kun mii aha/ ki shi/ kun ta ’kup̱ ki aha/ mo, dhali dhalku/ ki dhal uni gwansan bway mo mmoshi’b e kun shi/ aha/ i e ki dar gi miiŋ kamu/ mo.

²⁰Haali/ uni ’koki o gwo gom moŋḵu’th is mo, hili ap̱o/ uni gwansan kun ’kon ki biyuu e mony’cesh mo tani uni bwaaki gwo kun hekuwa he’k e mo.

²¹Uni ḵa’dki ’twam buni kun beeyabee ap̱o/ aha/ mo. Uni oki gwo mo ki: Soso soso. Em bana p̱arki a’di e mo.

²²/E mishkin mo, ayy Tap̱a. Dhalku/ ki c̱a’b ki shwamm mo ma, ayy Tap̱a, dhalku/ ki si’d ’peni aha/ mo.

²³Muri is pini mo ma, dhali meri is gom tom pem jin raḵ aha/ mo, dhali tom pem jin p̱u’du’d mo. Arumgimis pem mo dhali Tap̱am pem mo.