SALMOS 22:17-29

¹⁷Hasta hueli nijpohuas noomiyohua, pampa sese nechcocohua. Nocualancaitacahua nechtachilijtoque huan san noca paquij.

¹⁸Momajmacaj cati nimoquentiyaya. Quena, mahuiltíaj ica piltetzitzi para quiitase ajquiya quitocaros sesen noyoyo.

¹⁹Pero ta, TOTECO, amo techtalcahui, pampa na niitztoc momaco. Xihuala nimantzi techpalehuiqui.

²⁰Techmanahui ten inimacheta ni mosisinijca masehualme cati itztoque quej chichime. Amo xiquincahuili ma nechmictica.

²¹Eltoc quej niitztoc inincamaco tecuanime, huajca techmaquixti. Nopa masehualme itztoque quej torojme, amo ma nechtompojhuica.

²²Huan na niquinpohuilis noicnihua ten ta, TOTECO, huan quema oncas tasentilisti, nimitzhueyichihuas iniixpa nochi.

²³TOTECO, tojuanti cati timitztepanitaj huan tiquimacasij timitzixpanose timitzpaquilismacaj. Nochi tiiteipan ixhuihua Israel, timitzhueyichihuaj. Quena, timitzhueyimatij nochi tiisraelitame.

²⁴Pampa amo techelcajtoc quema titaijyohuíaj, yon amo techhuejcamajcajtoc. Amo cana techcuanecatatilía. ¡Amo! Ta techtacaquilía quema timitztajtaníaj techpalehuiqui.

²⁵Huajca, TOTECO, ipan nopa hueyi tasentilisti nimitzpaquilismacas iniixpa nochi momasehualhua, pampa ta titemachti. Iniixpa cati mitztepanitaj huan quiimacasij mitzixpanose, na nijchihuas cati nimitztencahuilijtoc para nijchihuas.

²⁶Huajca nochi cati teicnetzitzi tacuase huan ixhuise. Nochi cati quitemohuaj TOTECO quipantise huan quipaquilismacase. Quena, paquise para nochipa.

²⁷Masehualme ten nochi talme campa hueli ipan taltipacti motepotztocase huan quielnamiquise TOTECO. Inijuanti pehuase quihueyimatise huan motancuaquetzase iixpa.

²⁸Pampa TOTECO, yaya nopa tanahuatijquet cati quinnahuatía nochi talme.

²⁹Nochi cati quipiyaj tomi huan nochi cati teicneltzitzi ipan ni taltipacti motancuaquetzase iixpa. Quena, nochi taltipac ehuani cati teipa miquise, quihueyimatise.