Salmos 19:4-11

⁴san dxezriluj da dxelenná na du gabí'i xe̱zr la xu, ne dxelezrín xrtizra' na dapa saca chee̱ xe̱zr la xu. Dios be̱ne̱' xabáa ca tu xu'u naga zua gubizra.

⁵Che zílala dxalaj na ca tu benne' wechaga na'. Dxebé na ca tu benne' dxezá chégüe̱' lu witja.

⁶Dxedxuaj na chalá'a naga dxalaj na, na' dxezrín na chalá'a naga dxebía na. Dxuchá'a na xúgute̱ da zaj de̱.

⁷Du lazre' naca da nadxixruj bea Xránadxu, ne dxuzé̱ chacha na bénne'du xú'udxu. Li lazre' naca da dxexeche̱be Xránadxu, ne dxunezruj na xel-la' sina chee̱ benne' ca' quebe zaj nape̱' na.

⁸Da líqueze zaj naca da nadxixruj bea Xránadxu, na' dxelebéle̱'e̱ benne' ca' dxelune̱' ca zaj naca na. Du lazre' zaj naca da dxuzéajni'i Xránadxu dxi'u, da dxuluzúa na dxi'u lu xel-la' naxaní'.

⁹Cháwedau' naca zrébedxu Xránadxu, da gun na súadxu chadía chacanna. Da líqueze zaj naca da dxuchi'a Xránadxu chee̱dxu, ne zaj naca na chawe'.

¹⁰Zaj naca na da dxezá lázredxadxu ca oro, ne ca oro zrente̱ da zácale̱'e̱ na. Zaj naca na zíxredxa ca bzrína'dau', da nácale̱'e̱ na zixre.

¹¹Dxulusizre na neda', we̱n zrin chiu'. Lawe' da dxuna' ca zaj naca na, da zrente̱ dxezi'a.