SALMOS 146:5-10

⁵Pero nelía paqui nopa masehuali cati quipixtoc quej itapalehuijca yaya cati iTeco Jacob, huan san ipan TOTECO iDios motemachía para quimocuitahuis.

⁶Yaya cati quichijchijqui ilhuicacti, taltipacti, hueyi at huan nochi cati itztoque nopona. Yaya cati quichihua nochi cati quitajtolcajtoc para quichihuas.

⁷TOTECO quinchihuilía cati xitahuac nochi teicneltzitzi cati sequinoc quintaijyohuiltíaj. Huan quintamaca cati mayanaj. Quinchihua ma yaca majcajtoque cati tzactoque masque amo teno quichijtoque.

⁸TOTECO quintachiyaltía popoyotzitzi. Quintanana cati nechca itztoque para huetzise. Huan quinicnelía cati monejnemiltíaj xitahuac iixpa.

⁹TOTECO quinmocuitahuía nopa seyoc tali ehuani. Yaya quinmocuitahuía cati icnotzitzi huan cati sihuame icnotzitzi. Pero yaya quisosolohua cati quisencahuaj masehualme cati amo quitepanitaj.

¹⁰TOTECO tanahuatis para nochipa. Amojuanti ipan altepet Jerusalén, amoTeco Dios elis nopa Tanahuatijquet, cati quinnahuatis nochi masehualme cati tacactiyase para nochipa. ¡Paquilisti!