SALMOS 141:3-8

³TOTECO, techmocuitahui para ma amo nicamanalti quej hueli. Techpalehui para nimocamatzacuas.

⁴Amo techcahuili nijnequis tamanti cati amo cuali. Amo techcahuili ma niquinpalehui taixpanoca masehualme ica cati quichihuaj. Ma amo niquixtoca nijcuas nopa cuali tamanti cati quipiyaj.

⁵Quema monequi se nechtalnamictis, xijchihua para cati monejnemiltíaj xitahuac moixpa ma nechtatzacuiltica. Ya nopa niquitas quej se cuali tamanti cati nechchihuilíaj. Sinta masehualme cati cuajcualme nechtacahualtise, elis quej se pajti para na. Amo techcahuili para nijhuejcamajcahuas ya nopa. Pero na talojtzitzi nimotatajtía para ma quiselica tatzacuiltili taixpanoca masehualme.

⁶Quema nijchihuas para mocuamimilose inintayacancahua ipan tepet, quicaquise nocamanal huan quipantise para nelcuali.

⁷Nopa fiero masehualme quiselise tatzacuiltili huan iniomiyohua quitepehuase ipan campa hueli tali.

⁸TOTECO, ta cati titoTeco, na san nimitzchiya para techpalehuis. Ipan ta nimotemachía para techmocuitahuis. Amo xiquincahuili ma nechmictica.