SALMOS 140:1-10

¹TOTECO, techmanahui inimaco nopa taixpanoca masehualme. Techmocuitahui para tatehuijca tacame amo huelis nechcocose.

²Inijuanti nochi se tonal quisencahuaj quenicatza quichihuase tamanti cati amo cuali. Talojtzitzi quinequij quipehualtise cualanti.

³Inincamanal tecocohua quej itencococa se cohuat o se colot.

⁴TOTECO, techmocuitahui para amo nihuetzis inimaco masehualme cati amo cuajcualme, huan cati tetaijilhuíaj, pampa inijuanti moilhuijtoque quenicatza nechhuihuiitase.

⁵Nopa masehualme cati mohueyimatij quitalijtoque se taquetzti para ma nimasi. Quitalijtoque se lazo para ica nechcuapilose para nimohuisos ajacatipa. Nechchiyaj ica se matat para nechmasiltise.

⁶Na nimitzilhuijtoc, TOTECO, para ta tinoDios. Techtacaquili quema nimitztzajtzilía.

⁷Ta tiTOTECO Dios, tinotemaquixtijca, ta tijpiya nochi chicahualisti para techmaquixtis. Ta techmocuitahuía quema onca tatehuilisti.

⁸TOTECO, amo xiquincahua ma tatanica nopa masehualme cati amo mitztepanitaj. Amo xiquinpalehui para quisas cuali cati quinequij quichihuase para ma amo mohueyimatica.

⁹Xijchihua para nochi tamanti cati moilhuijtoque quichihuase ma huetzi ininpani. Ma tzontamica senquisa quej quisencajtoyaj nechtzontamiltise na.

¹⁰Ipan inintzonteco ma huetzi ticoli, o xiquinmajcahua ipan tit, o ipan ostot cati tahuel huejcata campa ayecmo huelise quisase.