SALMOS 136:16-23

¹⁶Xijtascamatica Toteco cati quinyacanqui imasehualhua ipan nopa huactoc tali, pampa itaicnelijcayo amo quema tami.

¹⁷Xijtascamatica yaya cati quinmanahui imasehualhua inimaco tanahuatiani cati quipixque miyac chicahualisti, pampa itaicnelijcayo amo quema tami.

¹⁸Yaya quintzontamilti huejhueyi tanahuatiani cati tahuel quipiyayayaj chicahualisti, pampa itaicnelijcayo amo quema tami.

¹⁹Quitzontamilti Sehón, inintanahuatijca nopa amorreos, pampa itaicnelijcayo amo quema tami.

²⁰Nojquiya quimicti Og, tanahuatijquet ten tali Basán, pampa itaicnelijcayo amo quema tami.

²¹Huan inintal nopa tanahuatiani, Toteco quinmacac imasehualhua quej se tamanti cati inintata quincahuilijtejqui, pampa itaicnelijcayo amo quema tami.

²²Quena, quimacac itequipanojca Israel para ma moaxcati nopa tali para nochipa, pampa itaicnelijcayo amo quema tami.

²³Yaya cati techelnamijqui tiisraelitame quema ayecmo tijpiyayayaj chicahualisti, pampa itaicnelijcayo amo quema tami.