Salmo 89:40-50

⁴⁰Pinadadael mo amin din alad di siyodad na, et dadlon binakas din kalabana din makneg ay beey ay pankamangan di ipogaw na.

⁴¹Amin ay malabas et akewen da din sanikwa na. Laslasoyen aben di katokmang na.

⁴²Nangabakem din kalabana et pinaragsak mo amin daida.

⁴³Nanbalinem din armas na ay magay silbi na, adi kan binadangan sin kalabana.

⁴⁴Kinaan mo din madaydayaw ay saad na, intep-am sin lota din korona na.

⁴⁵Nanbalinem ay nakay ay nasapsapa et kababain di kasasaad na.

⁴⁶Pig-an pay ay dengngem din kararag ko ya makaan din palalo ay bonget mo?

⁴⁷Nemnemem koma ay aptik di biyag mis na, pinarsuam amin ay ipogaw ay way gedeng di biyag da.

⁴⁸Sinoy natago ay magay kateyana ya makalisi sin kaiponponana.

⁴⁹Into pay din magay balbaliw na ay layad mo ed idi yan matalek ka ay nangikari en David adi?

⁵⁰Nemnemem koma din panglaslasoy dan dakami ay ipogaw mo ya din pangoy-oyaw di kaipoipogaw ay ninam-os ko.