Salmo 85:5-13

⁵Adi ka koman mabonget en dakamis eng-enggana.

⁶Papigsaem kasin dakami ta manragsak din ipogaw mo gapon sik-a.

⁷Ipailam koman dakami din adi manbalbaliw ay layad mo ya isalakan mos dakami, Apo.

⁸Dedengngek di ibagbagan Diyos ay kari na en idawat na di talna en datako ay ipogaw na mo adi tako taolien din inam-amag tako ay lawa.

⁹Nakasagana ay mangisalakan sin mangipatpateg en sisya, ta say mantoltoloy ay maipaila sin ili tako din somili ay kinadiyos na.

¹⁰Din layad ya kinamatalek yan awni et mantapi da, yan mankoyog di kinalinteg ya talna.

¹¹Mawada di kinamatalek isnan daga, si Diyos ed langit yan ipaila na abe di kinalinteg na.

¹²Idawat Diyos di bindisyon et omad-adoy apit sin daga.

¹³Mangon-ona di kinalinteg sin sangoanana ay mangisagana sin pandanana.