Ola Saam 85:5-13

⁵God wanim yu garra dum? Yu garra jidan nogudbinji langa melabat olagijawan? Yu garra jidan nogudbinji en wail langa melabat en melabat bigininimob hu garra jidan bambai du?

⁶Yu meigim melabat strongbala igin wulijim melabat yu pipul olabat garra preisimbat yu gudbinjiwei.

⁷YAWEI yu seibum melabat, en shoum melabat yu laigim melabat olataim.

⁸Lisin langa wanim YAWEI det trubala God im toktok langa wi. Wi jidan im ronwan pipul olabat. Im pramisim wi blanga jidan gudbinjiwei if wi nomo gobek langa wi nogudbalawei.

⁹Trubala, im oldei redi blanga seibum ol detlot hu oldei shoum rispek langa im, en im garra oldei jidan iya langa wi kantri du.

¹⁰YAWEI yu na laigim yu pipul olabat brabliwei, en yu na oldei jidan trubala langa olabat olataim. Yu na oldei dum ebrijing raitwei blanga olabat, en yu na oldei meigim ebrijing gudwan blanga olabat.

¹¹Wen pipul jidan trubala langa God tharran na garra gowap langa im, en det raitwei blanga God garra kamdan en jidan langa olabat.

¹²Trubala, YAWEI garra gibit ola gudwan ebrijing, en wi kantri garra abum detmatj daga.

¹³Det trubalawei blanga YAWEI garra go lida langa im, en meigim det wei redibala blanga im.