Salmo 78:36-69

³⁶Ngem pag etek amin ay kali da, maga polos di tet-ewa.

³⁷Baken dan napodno en sisya, nilabsing da din intolag nan daida.

³⁸Ngem managseg-ang si Diyos sin ipogaw na et pinakawanas daida, adi na pinses daida. Namin ado ay intoled na din bonget na en daida.

³⁹Tan ninemnem na ay owat dan ipogaw ay kaman dagem ay malabas yan malitaw.

⁴⁰Sin lugar ay magay omili, kinontra das sisya, namin ado ay nanladingiten da.

⁴¹Pinadapadas das sisya et nansakiten dan nemnem na, sisya ay nasantoan ay Diyos di Israelita.

⁴²Nilinglingan da din panakabalina sin agew ay nangisalakananan daida sin kalaban da.

⁴³Nakaskasdaaw di inamag na ed Egipto sin tanap ed Zoan ay kanan da.

⁴⁴Nanbalinena si dada din ginawang da et maga di inomen da.

⁴⁵Ad-ado ay ngilaw di inpawada na ay begew si naligatan da. Inpawada na abey tokak ay nanadael sin daga da.

⁴⁶Wada pay di dodon ay inbaa na ay nangan ya nanadael sin mola sin payew da.

⁴⁷Babaen si dalalo ya andap, dinadael na din obas ya sikomoro da.

⁴⁸Pinse nas dalalo ya kimat din baka ya karnero da.

⁴⁹Inpalak-am na din palalo ay bonget na en daida, et palalo ay nadosa da sin nangibaaana sin aanghel na ay mamaligat ya mamse en daida.

⁵⁰Adi nan intoled din bonget na ya adi nan inpalobos ay matago da, mo adi et babaen si pisti yan pinse nas daida.

⁵¹Din besag di amin ay pamilya ed Egipto yan pinse na.

⁵²Pag nan ipango din ipogaw na sin lugar ay magay omili sin nanbalasatan da ay kaman dan karnero ay ipaspastol na.

⁵³Magay lawa ay napasamak sin nangipangoana en daida et magay nandanagan da, ngem nilim-otan din baybay din kalaban da.

⁵⁴In-ey na din ipogaw na sin nasantoan ay daga na, sin dontog ay inabak na babaen sin panakabalina.

⁵⁵Inabo nan omili sin dinmatngan di ipogaw na, biningabingay na din daga da sin Israelita, indawat na abe din beey da.

⁵⁶Ngem si Diyos ay Kangatoan yan kinontra da ya pinadapadas das sisya, adi dan tinongpal din bilbilina.

⁵⁷Baken dan napodno ya kinonkontra das sisya ay kaman met laeng din aam-a da. Adi dan kaiturong ay kaman dan natiko ay pana.

⁵⁸Tan si Diyos yan inpabonget da gapo sin pandaydayawan da ay sin dodontog di nangisaadan da. Nan-imonen da gapo sin didiyosen da.

⁵⁹Palalo ay binmonget si Diyos sin nangilaana isna, et dadlonan dinokogan din Israelita.

⁶⁰Din nanbeeyana ed Shilo yan binaybay-ana, din nakiteanas ipogaw ay tolda na.

⁶¹Inpalobos na ay posen ya isaan di kalaban da din Baol di Tolagan ay sinyal di panakabalin ya dayaw na.

⁶²Binmonget sin ipogaw na et binaybay-ana ay peslen din kalaban da.

⁶³Natey sin gobatan din babbaro da, et magay mangasawa sin babalasang da.

⁶⁴Natey si kampilan di papadi da, ngem magay iyat din aas-awa da ay mangiladingit en daida.

⁶⁵Kaman naseseyep si Diyos ngem binmangon sin odi na, kaman soldado ay tinmoled sin arak ay ininom na.

⁶⁶Nansisianena din kalabana, naabak da et maibabain das eng-enggana.

⁶⁷Sinigaana din polin Jose, din polin Efraim yan adi nan pinili.

⁶⁸Ngem say pinili na et din tribun Juda, pinili na ed Zion ay laylaydena.

⁶⁹Insaad nas di din Timplo na ay kaman din beey na ed daya, kaman din daga ay insaad na ta komakaman si eng-enggana.