9Sukaman mana allita rurashpankuna willansapa Tata Diosta mana kasunayanankunata. Runakunatapish washanchansapa.
10Chayrayku runamasinkuna paykunata alabansapa. Paykunata sukaman kreyinsapa.
11Rimansapa: “Tata Dios mana alli rurananchikunata mana yachankachu. Sielupi kawsak Tata Dios mana nimata yachanchu.”
12Chay mana alli rurak runakuna mana nimapi sufrishpankuna kullkiyansapa.
13Chayta kawashpa yuyarkani: “Llullakushpa alli shunkuyuk runa kawsaykani. Llullakushpa allillata rurashpa kawsaykani.
14Tukuy oras sufrini. Tukuy diya Tata Dios kastigawan.”
15A, Tata Dios, chay mana alli rurak runakunashina chayta rimashpaynika kreyishukmasinikunata llullachiymansapa karkan.
16Chayta yuyashpayni mana atiparkanichu entiendiyta imapami Tata Dios mana uchankunarayku kastigansapa nishpa.
17Tata Diospa wasinpi yaykushpaynira allita yacharkani Tata Dios chay mana alli rurak runakunata kastiganankunata.
18A, Tata Dios, kanmi chay mana alli rurak runakunata churashkanki llukchak ñanpishina uchallikuptinkuna kulluchinaykipasapa.
19Raslla paykunata kastigankisapa. Paykunaka manchakuywan wañunkasapa.
20Paykuna llullachinakuptinkunapish kan, Tata Dios, kastigakunayki diya chayamuptin tukuy mana alli rurashkankunata tukuy runakunata kawachinkisapa.
21Chay mana alli rurak runakunata kawashpa sukaman turbakurkani. Turbakushpa sukaman llakirkani.
22A, Tata Dios, mana nima yachak kashpayni ñawpaknikipi suk animalshina karkani.
23Chashna mana entiendiptinipish kanka kuyawashpa mana sakiwashkankichu. Makinimanta apiwashpa purichiwakshina yanapawashkanki.
24Yachachiwashpa yanapawashkanki allita rurashpa kawsanaynipa. Chaymanta kawsanaykipi kushikushpa chaskiwanki.
25Kanlla sielumanta yanapawanki. Kanwan kawsashpayni mana nima ashwanta munanichu.
26Sukaman sampayaptinipish, kan tata Dios, mana tukuyniyukta kuyawashpa yanapawanki.