Salmo 49:11-15

¹¹Man nawala i tanà gumnèla nfunla kel di landè sen, taman dagitla i tanàla sngad dale dagit, bay i kaglutan, i lbang gumnèla kel di landè sen.

¹²Balù nun kdatah i dad to, knean mati ale salngad i dad lmanaf.

¹³Tatìyu neye ku tan gukel i to smalig di kton, na fsen nawan di knunan.

¹⁴I gukel dad to smalig di ktola mati salngad di dad bilibili nebe di gutmatê dale; fati i mebe dale ditù di lam i lbang. Na di là mlo mdanà ale di dad to matlu, du i fye kagkahla baling lana di kbalok i lawehla di lam i gumnèla di lbang.

¹⁵Kabay nsò agu Dwata mdà di agot i fati, du dnawatan agu.