SALMO 34:7-22

⁷Tata Diospa angelninkuna tukuy Tata Diosta kasuk runakunata amachansapa.

⁸Kankuna mishkik mikunata mallikshina Tata Diosta kuyaychi yachanaykichipa alli rurak kananta. Tata Dios yanapashunaykichita yachashpaykichi sukaman kushikunkichi.

⁹Kankuna, Tata Diosta kasuk runakuna, payta kuyaychi. Chashna kuyaptikichi manami nima illapushunkichichu.

¹⁰Pumakuna sinchi kashpankunapish yarkansapa. Chashnapish kaptin ñukanchikuna Tata Diosta kasuptinchikuna aypa allikunata kuwanchisapa.

¹¹Wambraynikuna, shamuychi uyariwak. Kunanka yachachiykichi imashnami Tata Diosta kuyankichi nishpa.

¹²Kunanka tapuykichi: ¿Munankichichu unayta kawsayta? ¿Munankichichu kushikushpalla kawsayta?

¹³Chashna kawsanayashpaykichika ama munaychichu mana allikunata rimayta nima llullakuyta.

¹⁴Mana alli ruranaykichita sakishpa allikunallata ruraychi. Tukuy piwan allillapi kushikushpa kawsaychi.

¹⁵Allita rurashpa kawsaptikichi Tata Dios kuydashunkichi. Roygaptikichi yanapashunkichi.

¹⁶Chaymanta Tata Dios tukuy mana alli rurak runakunata chikninsapa. Paykunata kulluchinkasapa amana ni pi paykunata yuyanankunapa.

¹⁷Allita rurashpa kawsaptinchikuna Tata Diosta roygaptinchikuna payka yanapawanchisapa. Llakishpa sufrishpa kawsaptinchikuna payka yanapawashpanchikuna kushichiwanchisapa.

¹⁸Tukuy uchanchikunata wananayashpa llakiptinchikuna Tata Dios llakichiwashpanchikuna perdonawashpanchikuna kushichiwanchisapa.

¹⁹Allita rurashpa kawsashpanchikunapish sukaman padesinchisapa. Chashna padesiptinchikunapish Tata Dios yanapawanchisapa kushikushpalla kawsananchikunapa.

²⁰Tata Dios yanapawashpanchikuna amachawanchisapa ama chikniwakninchi runakuna tullunchikunata polvonankunapa.

²¹Chaymanta sakra runakuna runamasinkunata wañuchinayashpa kikinkunalla wañuyta maskaykansapa. Tata Dios tukuy alli rurakta chiknik runakunata kastigankasapa.

²²Chaymanta Tata Diosta kasushpa kawsaptinchikuna payka llakichiwashpanchikuna salvawanchisapa. Tata Dios amachawananchikunata munaptinchikuna payka mana kastigawanchisapachu.