Salmo 34:11-22

¹¹Taman fdadong gamu dini na flinge gamu dad ngàgu; na tdòta gamu smalig na likò di Amuito Dwata.

¹²Mayè gamu dé ku nun fye knèyu na ku mlawil gamu? Mayè gamu dé ku nun klehewyu?

¹³Ani kibòyu, too fgeye du fye là gamu talù sasè; na nang gamu tmulen kéng.

¹⁴Tnagakyu dad sasè nimòyu na nimòyu i fye; na tooyu lalò i dalan kasaglabat na i ksasatu nawa.

¹⁵I Amuito Dwata, toon neye i dad to matlu, na lingen i katlola kenen.

¹⁶Kabay i dad to mimò sasè toon knang, talaan ale fnalê, na di kfatila flifetan i dad to, du fye landè to di tah tanà faldam dale.

¹⁷Kabay linge i Amuito Dwata katlo i dad to matlu ftabeng di kenen, na falwaan ale di kdee kaflayamla.

¹⁸Tnabengan i dad to malbà i nawala, na i dad to too mlidù mdà di salàla falwaan.

¹⁹Dee kaflayam gnagu i to matlu, bay i Amuito Dwata tmabeng kenen di kdee.

²⁰Balù dad tulanan fangeyen du fye landè tfò.

²¹I nimò i dad to sasè, én i gamfati dale; na nukum kadang di salà i dad to mnang nawa i dad to matlu.

²²I Amuito Dwata i msò dad saligan di agot i fati, na laan nukum di salà i dad to smalig di kenen.