A Umana Kakailai 34:11-22

¹¹Avat a mai, a umana bul, avat a valongore iau; Ina tovo tar ra variru tadav ra Luluai ta vavat:

¹²To i mainge ra nilaun tuna, Ma to ia i mainge ba na lolovina kana nilaun upi na gire ra boina tana?

¹³Una tur bat ra karameam ta ra kaina tinata, Ma ra ngiem bula upi koko na vavaongo.

¹⁴Una vana kan ra kaina, ma una pait ra boina; Una tikan upi ra malmal ma una mur ia.

¹⁵A mata i ra Luluai i gire ung ra umana tena takodo, Ma ra talingana i valongore kadia kinail.

¹⁶A mata i ra Luluai i tur bat ra umana tena varpiam, Upi na vamutue ra ninunuk uraure diat kan ra rakarakan a gunagunan.

¹⁷A umana tena takodo dia kail, ma ra Luluai i valongore, Ma i valangalanga diat kan ra lavur magit i monong diat.

¹⁸Ra Luluai i maravai pire diat i takunuan ra bala i diat, Ma i valaun diat i tabun ra tulungea i diat.

¹⁹A tena takodo i kairane mangoro na magit na varmonong, Ma ra Luluai i valangalanga kan diat par.

²⁰I vaale bat ra uruna par, Pa ta tikai i tabubur.

²¹Ra kaina mangamangana na ubu ra tena varpiam, Ma da kure diat dia milikuane ra tena takodo.

²²Ra Luluai i kul bat ra nilaun kai kana umana tultul, Ma pa da takun ta tikai ta diat dia nurnur tana.