Samu 34:11-22

¹¹Mafaꞌne anagaꞌmogitapamo etapa geꞌnimo afiyo. Ala kava nefekeꞌmo koli hutetapa akame hisaya kavaꞌmo aliꞌna lapaya malegauvanagi eyo.

¹²Alagepa hutapa yatala afinaꞌmo maiꞌnetapa lapamogaga aisayafeꞌmo lapauꞌnifiye.

¹³Inagi lapauꞌnisiyana hosu gemo osuge aigofe gemo osuge hisayafeꞌmo alagepa hutapa yagaitapa lapateyo.

¹⁴Hosu kavategatiꞌmo maitapa halove hutapa eta alagepa kavakeꞌmo hiyo. Kaveta osutapa alagepa hutapa magokepi lokaetapa maisayafeꞌmo kahauya hutapa vegala aeyo.

¹⁵Ala kava neꞌmoꞌa alagepa kavaꞌmo nehaya vayaꞌaiteꞌmo yagaino apateꞌneno aukaya huꞌa ge nehaya geꞌapimo neꞌafiye.

¹⁶Neꞌafiyaꞌmonanafa hosu kava nehaya vayaꞌaifeꞌmo kame huno neꞌapategeꞌa faliꞌnagenoꞌaeꞌmo ago apake nekaniye.

¹⁷Fatago vayaꞌmogimo keya aeꞌa ge nehageno afitenoꞌaeꞌmo muki hanageke yapatiꞌmo apakufamo alino katino neꞌapate.

¹⁸Ala kava neꞌmoꞌa yulagefa neꞌaiya vayaꞌai hapaopaleꞌmo maiꞌnenoꞌaeꞌmo afepilagamo faleꞌa haiꞌa neꞌmaiya vayaꞌai apakufamo alino katino neꞌapate.

¹⁹Alagepa vayaꞌmogimo lusi hanageke yaꞌmo neꞌaliyaꞌmonanafa Ala kava neꞌmoꞌa muki hanageke yapatiꞌmo apakufamo alino katino neꞌapate.

²⁰Ala kava neꞌmoꞌa kanale vekaleꞌmo alagepa huno yagaino ateꞌnigeno magoke ayamufamo alagi lo oꞌaeꞌniye.

²¹Hosu vayaꞌmo hosu kavaꞌapimoꞌmo apamagisigeꞌa faligae. Alagepa kavaꞌmo nehaya vayaꞌaifeꞌmo nohapaiya vayaꞌmo kayoꞌmo apamigiye.

²²Ala kava neꞌmoꞌa aliꞌyaꞌamo neꞌaliya vayaꞌai apakufamo miya faino alino katino neꞌapate. Agaepiꞌmo eꞌa fala nekiya vayapatiꞌmo magoke vekaeꞌmo, hosu vekamo maiꞌnane, huno huteno alagi alino hafaino oꞌatalegaiye.