Salmo 145:13-18

¹³Din panturayam ay Yahweh, magay pap-eng na, tan ari ka si eng-enggana. Amin ay karim et sigurado ay tongpalem, yan maila din seg-ang mo sin amin ay amagem.

¹⁴Din maligligatan et badangam daida, ya papigsaem din nemnem di madisdismaya.

¹⁵Sik-a di pannamnamaan di amin ay parsua, et idawat mo sin kosto ay timpo din kanen da.

¹⁶Idawdawat mo din kanen di esa ya esa, et mangan da enggana ay mabsog da.

¹⁷Sin amin ay amagem, nalinteg ka, kanayon abe ay managseg-ang ka.

¹⁸Mo way ipogaw ay naimposoan di kararag dan sik-a, nakasagana ka ay mangidawat sin kedawen da.