SAAMUNƆ 31:13-23

¹³Mɛɛ̀ ma kɛ̀ gbɛ̃nↄↄ e ma pee pari, vĩapↄnↄↄ ligamazi. Aↄ̃è kakↄ̃a wà lɛ́ kpákↄ̃sↄ̃mazi, aↄ̃è lɛdolɛ kɛ ma wɛ̃̀ndibↄna yãnzi.

¹⁴Mↄde ḿbe ma n náanɛ kɛ̀ Dii, mɛɛ̀ be ma Ludan n ũ.

¹⁵Ma wɛ̃̀ndi ègↄ̃ kú n ↄzĩ gurↄ píngimɛ, ǹ ma sí ma ibɛɛ kɛ̀ aↄ̃ↄe ma wɛtɛɛ wà ma dɛɛnↄ ↄzĩ.

¹⁶Ǹ uu were mamↄma n zↄ̀bleria, ǹ ma mì sí n yenzi guu.

¹⁷Dii, ǹton tó wí ma kũro, zaakɛ ma wii pɛ̀nzi. Ǹ tó wí zaakɛrinↄ kũ, ǹ tó aↄ̃ lɛ́ gↄ̃ nakↄ̃ana gɛ̀wãan,

¹⁸ǹ tó ɛgɛtori pìnↄ nɛ́nɛ naɛ. Aↄ̃è dↄkɛ kↄ̃n gbɛ̃ maaanↄ, aↄ̃è kya káńgu kↄ̃n ĩadãnao.

¹⁹Auziki kɛ̀ ń kàkↄ̃a n vĩakɛrinↄnɛ bíta, nɛɛ̀ aubarika da gbɛ̃ kɛ̀ aↄ̃ↄ nanziinↄn gbɛ̃ píngi wáa.

²⁰Tó gbɛ̃nↄ lɛ́ kpàkↄ̃sↄ̃ńzi, nɛɛ̀ ń utɛ n kuu, tó wèe lɛokpakↄ̃a kɛɛńyo, nɛɛ̀ ń dãkpa n kukiia.

²¹Aubarikadeen Dii ũ, zaakɛ à yenzi bíta ↄ̀dↄamɛ wɛ́tɛ kɛ̀ wà lìgazi guu.

²²Swɛ̃̀ kɛ̃̀magu gwe, ben ma bè, wà n kii zɛ́ zↄ̃̀mɛ. Kɛ̀ ma faaba lɛ́ zùnzi, n ma wɛ̃nda wiipɛna mà.

²³Àgↄ̃ ye Diizi, amↄa a gbɛ̃nↄ. Dii è a náanɛkɛrinↄ dãkpa, è fĩa bo ĩadãrinↄnɛ pãsĩpãsĩ.