Salmo 31:13-23

¹³Egkezineg ku is kebpenènaasà te mezakel he menge kuntada. Ebpemiligru a minsan hendei a ebpevayà, su mibpelenuwan e zan te edhimatey.

¹⁴Iyan, midsarig a ziyà te kenikew, Nengazen. Iyan ka Megbevayè ku.

¹⁵Is untung ku ne ziyan te kenikew; libriya a te menge kuntada ku he edezaat kedì.

¹⁶Ipeehè nu is keupiya nu kedì te suluǥuen nu; ne ǥeina te mahal a kenikew, ne libriya a kenikew.

¹⁷Nengazen, kenè nu ituǥut he mepeel-elezi a, su ziyà a te kenikew megnganey. Iyan nu zà peel-elezi is menge lalung he etew ne penhimetayi nu sikandan, su wey zan mekepereremek en diyà te leveng dan.

¹⁸Ipetiem nu heeyan is menge teruen he ebpegalbu wey edsudì te menge metazeng.

¹⁹Utew zekelà is keupiyaanan he idteǥana nu te menge etew he edtahud wey edsarig kenikew. Egkaahà te langun is keupiya nu.

²⁰Id-eles nu sikandan diyà te lugar he zutun ka, ne zutun kenà sikandan egkesudì wey egkeinsultuwan te menge etew.

²¹Nengazen, ereg ka he edeliǥen! Su egkein-inuwan is paaǥi te kebpaahaa nu te ǥaǥew nu kedì hein diyà a te sevaha he inged he midlingutan te menge kuntada.

²²Tenged te utew ku kegkahandek, kunaan ku ke mibpekidsuwey ke en kedì. Iyan, dutun, midineg nu is kebpehizuhizu ku zutun te kebuyù ku te tavang diyà te kenikew.

²³Sikiyu is menge etew te Nengazen he metinumanen, mahala niw sikandin. Ebentayan te Nengazen is menge metinumanen, iyan, dekelà mulà is idsilut din te menge mepelevawen.