SAAMUNƆ 119:37-108 - Luda yã takada kↄ̃n Bokobaru yão

³⁷Ǹ ma wɛ́ɛ go pↄ́ pãanↄa, ǹ ma wɛ̃̀ndi dãkpa lán ń ò nà.

³⁸Ǹ yã kɛ̀ ń ò papa mↄma n zↄ̀blerinɛ, lɛ́ kɛ̀ ń gbɛ̃̀ n vĩakɛrinↄnɛ.

³⁹Ǹ tó sↄ̃sↄ̃na kɛ̀ mɛɛ̀ à vĩa kɛɛ gomala, zaakɛ n dokayãnↄↄ maa.

⁴⁰Má ye n ↄdↄkiizi fá, ǹ ma wɛ̃̀ndi dãkpa n maakɛɛ guu.

⁴¹Dii, ǹ mↄ́ ǹ gbɛ̃kɛɛ kɛmɛ, ǹ ma mì sí lán ń ò nà,

⁴²gbasa mà yã sí ma sↄ̃̀sↄ̃rila, zaakɛ mɛ́ɛ n yã náanɛ kɛɛ.

⁴³Ǹton yãpura yã sí ma lɛ́nlo, zaakɛ n yãzɛdeen má wɛ́ɛ dↄzi.

⁴⁴Mɛ́gↄ̃ n doka kũna ai gurↄ píngi,

⁴⁵Mɛ́gↄ̃ tɛ́ aafia, zaakɛ ma n ↄdↄkii wɛ̀tɛ.

⁴⁶Mɛ́ n yãnↄ o kínanↄ aɛ, wí é ma kũ sↄ̃ro.

⁴⁷N yãdiɛnanↄ è kɛ ma pↄↄnɛ, zaakɛ má ye yã pìnↄzi.

⁴⁸Ma gã̀ sɛ̀ n yãdiɛna kɛ̀ má yezinↄnɛ, mɛɛ̀ laasuu lɛ́ n yãdannɛnanↄa.

⁴⁹Ǹ dↄ yã kɛ̀ ń ò n zↄ̀blerinɛn, zaakɛ ń tò ma wɛ́ɛ dↄzi.

⁵⁰Yã kɛ̀ è ma làakari kpáɛ ma nawɛ̃akɛnan yɛ̀, n lɛ́gbɛ̃na bé è ma wɛ̃̀ndi dãkpa.

⁵¹Wadadeenↄↄ e ma faboo yãana sai, baa kↄ̃n beeeo mɛɛ̀ zã n dokaaro.

⁵²Mɛɛ̀ dↄ n dokayã kɛ̀ kú zaa ziinↄn, ben aↄ̃è ma nↄ̀sɛ yĩi kũmɛ, Dii.

⁵³Mɛɛ̀ pↄ fɛ̃ maamaa, kɛ̀ zaakɛrinↄ è pã kpá n dokazi yãnzi.

⁵⁴Mɛɛ̀ lɛ̀ sí n yãdannɛnanↄ musu ma kuuna anduna kɛ̀kii guu.

⁵⁵N yã ègↄ̃ dↄmagu gwãavĩ, Dii, mɛɛ̀gↄ̃ n dokayãnↄ kũna.

⁵⁶Ma yã beeenↄ kↄ̃ dↄ̃̀, zaakɛ mɛɛ̀gↄ̃ n ↄdↄkii gwaa.

⁵⁷Dii, ḿbe ma baka ũ, ma lɛ́ gbɛ̃̀ kɛ̀ mɛ́ n yã ma.

⁵⁸Mɛɛ̀ kúɛ kɛnnɛ kↄ̃n nↄ̀sɛo do, ǹ sùu kɛmao lán ń ò nà.

⁵⁹Ma a yãkɛnanↄ laasuu lɛ̀, ben ma sↄkpa n dokayãnↄa.

⁶⁰Mɛ́ wã, mɛ́ gbá gáɛro, lɛ mà n yãdiɛnanↄ da.

⁶¹Baa kɛ̀ gbɛ̃ zaaanↄ bà fĩ̀kãmazi, n dokayãnↄ é sãmaguro.

⁶²Mɛɛ̀ fɛɛ mà sáabu kɛnnɛ lezãndo n dokayã maaanↄ musu.

⁶³N vĩakɛri píngi gbɛ̃nnan ma ũ, gbɛ̃ kɛ̀ aↄ̃è n ↄdↄkii gwaanↄ.

⁶⁴Dii, n gbɛ̃kɛɛ anduna pà, ǹ n yãdiɛnanↄ damɛ.

⁶⁵N à maaa kɛ̀ mↄma n zↄ̀blerinɛ, lán ń ò nà, Dii.

⁶⁶Ǹ wɛ́ɛzɛ̃ɛ kↄ̃n dↄ̃nao damɛ, zaakɛ ma n yãdiɛnanↄ sì.

⁶⁷Lɛ ń kpɛ́ ǹ ↄ tↄ̃ma, má sãsãnamɛ, mↄde tia sa má n yã kũna.

⁶⁸Ń maa bensↄ̃ n yãkɛnanↄↄ maa, ǹ n yãdiɛnanↄ damɛ.

⁶⁹Baa kɛ̀ wadadeenↄ yãsiaa nàma, mɛɛ̀gↄ̃ n ↄdↄkii gwaa kↄ̃n nↄ̀sɛo do.

⁷⁰Aↄ̃ swã gbã̀gbã, èe yã maro, mↄma sↄ̃ ma pↄↄ nna n dokaa.

⁷¹N ↄtↄ̃mana kɛ̀mɛ maa, lɛ mà e mà n yãdannɛnanↄ dada.

⁷²Doka kɛ̀ bↄ̀ n lɛ́n maamɛ dɛ vura kↄ̃n kondogi bↄrↄ ũgbangbanↄla.

⁷³N ↄↄ ma í kàsa à ma kɛ, ǹ ma gba ↄ̃ndↄ̃ↄ mà n yãdiɛnanↄ dada.

⁷⁴N vĩakɛrinↄ é ma e wà pↄnnaa kɛ, zaakɛ n yãn ma tãmaa dↄa.

⁷⁵Dii, má dↄ̃ kɛ̀ n dokayãnↄↄ maa, kɛ̀ ń náanɛ vĩ yãnzin n ↄ tↄ̃̀mazi.

⁷⁶Ǹ gbɛ̃kɛɛ kɛmɛ lɛ ma nↄ̀sɛ kpáɛ, lán ń ò mↄma n zↄ̀blerinɛ nà.

⁷⁷Ǹ mↄ́ ǹ wɛ̃nda dↄ̃mɛ lɛ màgↄ̃ kuu, zaakɛ n dokayãnↄn ma pↄnnaa ũ.

⁷⁸Ǹ tó wí wadadee kɛ̀ aↄ̃ taari kɛ̀mɛ pãnↄ kũ, mapi sↄ̃ mɛ́ laasuu lɛ́ n ↄdↄkiia.

⁷⁹N vĩakɛrinↄ su ma kiia, gbɛ̃ kɛ̀ aↄ̃ↄ n yãnↄ dↄ̃ↄnↄ.

⁸⁰Ǹ tò ma nↄ̀sɛ gↄ̃ pura n yãnↄ musu lɛ wí tón ma kũro yãnzi.

⁸¹N mìsina yã e ma swɛ̃̀ blee, n yãn ma wɛ́ɛ dↄzi.

⁸²Ma wɛ́ɛ dↄ̀ n lɛ́gbɛ̃nazi ai ma kpasa, bↄrɛn nɛ́ ma nↄ̀sɛ yĩi kũmɛɛ?

⁸³Má dɛ lán báa bↄ̀kↄ kɛ̀ tɛ́sukpɛ mà bà, baa kↄ̃n beeeo n yãdiɛnanↄ è sãmaguro.

⁸⁴Mↄma n zↄ̀bleri mɛ́gↄ̃ n dãa ai bↄrɛmɛ? Bↄrɛn nɛ́ ĩa da ma wɛ́ɛtãmmarinↄa?

⁸⁵Wadadeenↄ è wɛ̀ɛ yↄ̃mɛ mà zun, aↄ̃ yã è kↄ̃ sɛ́ kↄ̃n n dokaoro.

⁸⁶N yãdiɛnanↄ píngi náanɛ vĩ, ǹ dↄmalɛ, zaakɛ wèe wɛ́ɛ tãama pãmɛ.

⁸⁷À gↄ̃̀ féte kɛ̀ aↄ̃é yãamao anduna guu, mↄma sↄ̃ mɛ́ɛ pã kpá n ↄdↄkiiziro.

⁸⁸Ǹ ma wɛ̃̀ndi dãkpa n gbɛ̃kɛ yãnzi, mɛ́ n yãnↄ da.

⁸⁹Dii, n yã ègↄ̃ kuu gurↄ píngi, à kãsãa pɛɛna zaa musu.

⁹⁰Ń náanɛ vĩ wɛ̃̀ kↄ̃n wɛ̃̀o, n anduna kàɛ, ben à kpɛ́ kuu.

⁹¹Pↄ́ píngi kpɛ́ kuu gbã̀a n doka musu, zaakɛ pↄ́ píngi è dↄnzi.

⁹²Tó n dokan ma pↄnnaa ũ yãro, lɛ ma kaatɛ ma nawɛ̃akɛna guu.

⁹³N ↄdↄkii é sãmagu zikiro, zaakɛ à gãzĩn n ma wɛ̃̀ndi dã̀kpa.

⁹⁴N pↄ́n ma ũ, ǹ ma mì sí, zaakɛ ma n ↄdↄkii wɛ̀tɛ.

⁹⁵Gbɛ̃ zaaanↄↄ e ma kpákpaa wà ma dɛ, mↄde ma làakari kú n yãnↄa.

⁹⁶Má è kɛ̀ pↄ́ maa píngi zaka lɛ́ kuumɛ, mↄde n yãdiɛnanↄ bíta lɛ́ vĩro.

⁹⁷Má ye n dokazi à kɛ̀ bíta fá, mɛɛ̀gↄ̃ laasuu lɛɛa zaa kↄngↄ ai uusiɛ.

⁹⁸N yãdiɛnanↄ è tó ma ↄ̃ndↄ̃ↄ gↄ̃ dɛ ma ibɛɛnↄ pↄ́la, zaakɛ à kú ma swɛ̃̀n gurↄ píngi.

⁹⁹Ma wɛ́ɛzɛ̃ɛ dɛ ma yãdannɛrinↄ pↄ́la ń píngi, zaakɛ ma laasuu ègↄ̃ kú n yãnↄamɛ.

¹⁰⁰Ma ↄ̃ndↄ̃ↄ dɛ mareenↄ pↄ́la, zaakɛ mɛɛ̀gↄ̃ n ↄdↄkiinↄ gwaa.

¹⁰¹Mɛɛ̀ mì kɛ̃ zɛ́ zaa píngia lɛ mà e màgↄ̃ n yã kũna yãnzi.

¹⁰²Mɛ́ɛ kɛ̃ n dokayãnↄaro, zaakɛ ḿbe ń dàmɛ.

¹⁰³N yãnↄ nnamɛ à kɛ̀ bíta, à nna dɛ zↄ́la ma lɛ́n.

¹⁰⁴N ↄdↄkii è ma gba làakari, Beee yãnzin ma za sãsãna zɛ́ pínginzi.

¹⁰⁵N yãn fitia ũ ma gbánɛ, è guu pumɛ zɛ́n.

¹⁰⁶Ma la dà ma sↄ̃ zɛo, kɛ̀ mɛ́gↄ̃ tɛ́ n dokayã maaanↄzi.

¹⁰⁷Ma wɛ́ɛtãmmana kɛ̀ bíta, Dii. ǹ ma wɛ̃̀ndi dãkpa lán ń ò nà.

¹⁰⁸Ǹ ma sáabukpana sí, gbasa ǹ n dokayãnↄ damɛ, Dii.