Romu 2:15-26

¹⁵E'inahuma hazazamo zamagrira Anumzamofo kasegema zamagu'afi krenteneana erinteama nehaze. Ana hu'negu zamagra zamagu'afi nentahizageno, antahintahiza'zmimo zmasamino, knare'za nehazanki haviza nehaze huno nezmasamie.

¹⁶Hagi mago kna ne-enkino Anumzamo'a Jisas Kraisimpi ana miko vahe'mofo oku'a antahintahizmia refko hugahie. Ama knare musenkemo hu'nea kante neramasamue.

¹⁷Tamagra Jiu vahe mani'none nehutma, Anumzamofo kasegemofonte manineta, Anumzamo'ene tragoteta mni'none hutma tamagra tamavufa erisaga nehaze.

¹⁸Tamagra Agri'ma avesinea zana inazamo fatgo higeno, havizana hune ko antahinaze. Na'ankure agri kasegema korapa rempi huramigeta antahi'naze.

¹⁹Tamagra zamavu asuhu vahe'mokizmi kama zamaveri nehuta, hanimpima mani'naza vahe'mokizmi tavi mni'none huta nehaza zankura, knare'za nehune hutma nehaze.

²⁰Tamagra tamagesama antahizana vahe'mo'zama neginagi avu'avaza nehaza vahe'mokizmi kana zamaveri nehune nehuta, mofavremokizmi Anumzamofo kana rempi hunezamune huta nehaze. Na'ankure Anumzamofo kasegefina, knare antahizane tamage'zana antahi vgare'none huta nentahize.

²¹Tamagrama vahe'mokizmi rempi hunezamita, hagi nahigeta tamagra'a rempi huta nontahize? Tamagra musufa oseho huta nezmasamize. Hianagi tamagra'a musufa nosazo?

²²Tamagra ru venenene anene monkoza osiho huta nehazanagi, tamagra'a anazana nosazo? Tamagra havi anumzante mono huonteho nehuta, mono nozmifintira kumzafa nosazo?

²³Tamagra kasegema antahinaza zankura tamufga erisaga nehaze. Hu'neanagi kasegema rutagrazana Anumzamofona ra agi eri haviza nehaze.

²⁴Na'ankure avontafepima hu'neana, Megi'a vahe'mozama Anumzamofo agima huhavizama nehazana, na'ankure tamagrama haza avu'ava zante anahu kea nehaze hu'ne. (Ais 52:5, Izik 36:20)

²⁵Na'ankure Jiu vahe'motma tavufga tgahu tamavutamava zamoma knarema hanie hanutma, kasegemofo amagema antesageno'e. Hianagi kasegema rutagrenageno'a tamavufga taga nehaza tamavutamavazamo'a amne'zankna hugahie.

²⁶Hagi megia vahe'mo'za zamavufga taga osune'za, Anumzamofo kasegema amagema'antesazana, zamufga taga osu'naza zamo'a zamufga tgahu vahekna hugahaze.