Romaq 2:15-26

¹⁵Yhangmoq gi, haû jep é tarâ hkyô pé lé, yhangmoq é i-myit unghkaû má kâ to bê nghut é lé, tûn shit bekô nghut mù, yhangmoq é myit má hkâm zô é hkyô le, haú lé saksé hkám byî nyi é eq, yhangmoq myit é hkyô gi, ahkuî mara hun kat, ahkuî mara hkyut kat kut nyi ri.

¹⁶Haú hkyô gi, ngò taî pyo é gabú danglù eq rajung za, byu pê é zaú nghop tô é hkyô pé lé, Hkrisduq Yesuq dông mai Garai Gasâng èq tarâ jéyáng é buinyì má dut râ nghut lhê.

¹⁷Nghut kôlhang, nàng gi, náng gûng nàng Yudaq byù rayuq nghut lhê ga mù, haû jep é tarâ lé lumhkau nyi é eq Garai Gasang lé xoq é hkyô má nghutbûn nyi é sû;

¹⁸Yhâng ô nau é hkyô lé sê é eq haû jep é tarâ mhoqshit é hkyô wó yû bê nghut é yanmai, je ahkyak é hkyô lé sê gàm hkoq é sû;

¹⁹haû jep é tarâ má, hpaqchyî eq tengmán hkyo é alik wó sû nghut é yanmai, haû myoqjit bâng é matú hkyô-u shê sû eq mauchut hkaû mâ é bâng é matú maubó nghut sû;

²⁰byù ngok pé lé mhoqshit sû eq zoshâng wui é sará nghut sû nghut é lé, sê gyô to sû nghut é nghut le gi,

²¹nàng, góbang lé mhoq byi sû nhîng, yhumsing gùng yhumsîng a mhoq yû lhú? A wó hkau ga hko taí luî nhîng, nàng gi, hkaû lhê a nghut lhú?

²²Su-myi sulàng lú hkyô a wó kut ga byu pé lé taí luî nhîng, nàng gi, su-myi sulàng lú hkyô kut lhê a nghut lhú? Hparà lhô lé a jú dik sû nàng gi, noqkuq yhûm lé hpyoq zo hpyoq shuq nyi lhê a nghut lhú?

²³Jep é tarâ eq séng luî nghutbun sû nàng gi, haû jep é tarâ lé lu laî é dông, Garai Gasang lé a hkungga kut lhê a nghut lhú?

²⁴Haû gi, "Garai Gasâng é myìng gi, nungmoq é yanmai, tûngbaù pê chyáng lhoq hpoî pyâm é huî ri." ga kâ tô é eq rajung za nghut ri.

²⁵Haû jep é tarâ lé nàng châng é nghut jáng, ahpyo-kuq hpyit hkyô gi, akyû bò bê nghut ri. Nghut kôlhang, nàng, jep é tarâ lé lu laî é nghut jáng, a hpyit é eq rajung za dut bê nghut ri.

²⁶Ahpyo-kuq a hpyit kôlhang, jep é tarâ hkyô pé lé châng é bang lé gi, ahpyo-kuq hpyit bê bang dông ge són byi lhê a nghut kó lhú?