1Kamani vahe'mokizmi agorga ana mikomota anteramita manigahune. Na'ankure miko hanavea Anumzamofontegati e'neankino, Anumzamo hankavea kamani vahe'mokizmia zamige'za fore hu'za mani'naze.
2Hu'negu iza'o kamani vahe'ma ha'rentesimo'a, Anumzamofo trake ha'renteankino, ana knazana agra'a erigahie.
3Na'ankure kamani vahe'ma mani'nazana, fatgo zama haza vahe zamazeri korera nosaze. Hianagi kefozama haza vahe zamazeri korera nehaze. Kamani vahe'ma kore huozmantesue hanunka, fatgo kavukva nehuge'za, kazeri antesga hiho.
4Kamani vahe'ma mani'nazana tamagri knare zanku huzmantege'za mani'nazanki'za, Anumzamofo eri'za vahere. Hianagi kagrama hazenkema nehanunka, korera hugahane. Na'ankure zamagra hazenkema hanaza vahe'mokizmi, knomazamino zmazeri fatgohu hakavea eri'naze, kano zamiza zamazeri fatgo hanaza agafare, Anumzamo'a zmantege'za mani'naze.
5E'ina hu'negu Kamani vahe'mokizmi zmagorgama mani'zamo'a knare hu'ne. Hianagi zmaheno zmazeri ante fatgo huzankukerompage, tagra'a tagu'tagesafina fatgo'za nehune huta antahigahune.
6Ama ana agafare takisi zagoa miza nehune. Na'ankure kamani vahera Anumzamofo eri'za vahe mani'naze, hakare'a knazupa zmagra vahe'ma kvagrizmante eri'za enerize
7Ana miko vahe'mokizmi zama eri'nesanazana etenka zamio, takisi zagoma amio hunesizana neminka, fenoma mizasenante takesi miza huo hanigenka miza nehunka, kore huzmanteho hu'nesaza vahera, kore hunezmanteta, ragi zmagi zmiho hunesia vahera, ra agi zamiho.
8Atrenkeno nofima hu'zamo'a tamagripina omaneno, hagi rumokizmi zamavesinte nofimoke tamagripine meno. Na'ankure tva'ontamirema nemanizamokizmigu avesintezamo'a, kasegemoma hu'nea kea eama nehie.
9Na'ankure kasegefina amanage hu'ne, Ru vene a'enena monko'zana osuo, Vahera zmahe'ofrio, kumzafa oso, vahe zantera kegnunu osuo hu'ne. (Eks-Uti 20:13-17) Ruga'a kasegemo'za ama magoke kasegefi me'naze. E'i ana kasegemo huno, kagraguma kavesi nentanankna hunka, tva'onkare maninesimofona avesinto hu'ne. (Lev-Pri 13:9)
10Tva'ontema mni'namokizmi avesintezamo'a havizana omnene. E'i ana hu'negu vahe'ma zmesintezamo'a kasege eriknare nehaze.
11Tamagra ama anahu tamavutamava hiho, na'ankure tamagra antahinaze, menina knamo'a kofa hu'nefi mni'nonanki, masenazafintira otiho. Na'ankure tahokeno tavrezamo'a, tagu'ama rukrehema hunontetima amare'ma ehnatiana, hago menina erava'o nehie.
12Hanizamo'a kofta huno vagaresigeno, masama fore'ma hania zamo'a kofta hu'ne. Ana hu'negu hanizamofo avu'ava zama nehuna zana netreta, msamofo ha' kukena hanune.
13Ana hu'negu msarema nehazankna huta knare tavutava nehuta, hanizamofo muse zampina omanita, aka tina oneta neginagi osuta, monkozana nosuta, monko avu'ava huzampina omanita, mago rimpa osu avu'avazampine omnita kanive oreho.
14Hu'neanagi atrenkeno, Ramo, Jisas Kraisi tamagripina mani'neno, kefozama hu tavesizana eri atreno.
