Rom 2:15-26

¹⁵Umu moneken, enyudak cheneken uli pasin douk nyanubu nyowoleh umu enyudak lo nyakli enyi balan douk adul anyape numun echechiluh apaluh. Ali echech douk wata ulkwip polomen ali chanubu chadukemech umu anabu nyultab douk chenek yopinyi, anabu nyultab chenek yowenyi.

¹⁶God eke ulkum mulomu enyudak nyalik uli balan ali eke nunek skel umu elpech. Ahudak nunek skelimech ahi nyumnah, anan eke nuklipu Jisas Krais umu nusuh kwotog nunek skel umu ihenyumali nyonobechuk uli elpechin tinytin nyunu ihenyumali enenyi enen yowenyi. Enyudak eke nyutoglu namudak kobi enyudak God ananin yopinyi balan yek yaklipepu enyi nyaklimu.

¹⁷Ali ipak chohwalepu Juda uli douk malmu? Ipak pakli ipak wosik Juda ali penehilau pakli ipak douk God ananipali elpech. Ali chopuk pakli enyudak lo God nakaguk Moses umu, ipak douk enyen wosik deke nyugakomepamu kwotog ali God nutulipu nuhwalepu duldulipali elpech.

¹⁸Ihenyumali pasin God naklimu puneken uli douk wosik padukemen. Ipak douk apenek skul umu enyudak ananin lo ali wosik padukemu duldulinyi pasin.

¹⁹Ipak pakli ipak wosik padukemech, ali pakli wosik deke pugilapech yah echudak nabes sechukechi o pupe kobi lait ali elpech chape yomotokweh uli umu agundak chenek yowenyimu eke chunatulugun.

²⁰Ipak pakli enyudak lo douk nyanubu bawagas umu ihenyumali save nyanu aduligeinyi balan. Namudak ali pakli ipak wosik deke punek skul umu chogolu chogolamu God ananin yopinyi pasin uli chunu echebuk douk wo chugamu chudukemech uli e.

²¹Ipak penek skulumu kipahechi, wakuli ipak yet douk wo punenek skulumu e, wak. Ipak douk paklipu kipahechimu kobi chukwu olugwih, wakuli ipak yet isave pakwih.

²²Ipak isave pakli elpech kobi chunasonukeh umu chunak hwaloh, wak. Wakuli ipak yet isave panasonukeh umu panak hwaloh. Oguhudak abaliguh douk kipahechi chenekoguh umu chunek lotumoguh uli, ipak Juda douk panubu pakli wakoguh. Wakuli ogudak wilag chawich chenek lotumoguh umu, ipak douk isave pawich pakwu olugwih.

²³Ipak isave patuk ipakich yeguh chakih pakli ipak wosik padukemu God ananin lo. Wakuli wak. Ipak pablo enyudak lo ali namudak douk panubu pabouk ananin yeul nyabihuk.

²⁴Ipak douk pagimeh kobi balan nyetemu God ananik buk uli nyaklimu. Nyakli, “Ipak meyoh penek yowenyi ali kipahechi douk echech wo Juda uli e chatulipu ali dakio cheyagwleh-umanu enen enen God.”

²⁵Sapos ipak punubu pugipechen piyaten enyudak lo seiwak God nakaguk Moses enyimu, orait enyudak pasin umu patah ipakiluh yegechiweluh umu wosik deke nyugakomepu. Wakuli sapos ipak kobi punubu pugipechen piyaten umu, orait ipak douk patoglu kobi elpech douk wo chudukemu God ali wo chutah yegechiweluh uli e.

²⁶Ipak ulkwip pulomu echech kipahechi douk wo chutah echechiluh yegechiweluh uli e. Sapos echech chunek enenyi enen lo nyaklien ulimu, God douk natulich nakli echech chape kobi echudak chatah yegechiweluh ulimu.