1Tamentinti zampima hanavema tinomota, hanavema otinesamokizmia zamaza hanune. Hagi tagra'ama taza huzankukera ontahisune.
2Mago'magomota tava'ontirema nemanisamokizmi knare'zanku huta zmaza nehanunke'za, zmentintifina hanaveti'za hage'za marerisaze.
3Na'ankure Kraisi'enena agra'a avufga aza haniazankura ontahineanki, avontafepina amanage huno krentene, Vahe'mo'za huhavizama hugantazana, nagri nagofetu huntegahaze hu'ne. (Sam-Zga 69:9)
4Na'ankure ko Anumzamofo avontafepima miko kema krente'naza kemo'a, tazeri antefatgo nehuno, tazeri hankavetisigeta knazantifina kazigzi huta nevuta, fore'ma hugahie huno avontafepi krente'nea zankura avega antegahune.
5Anumzamo knazantifima tazeri hankavetigeta kazigazi huta nevumo, Kraisimpina mago tamarimpama huzana tamisigeta, magoke huta manigahune.
6E'ina hu'negu ana mikomota mago tamarimpa nehuta, tagrira erinte mago huta, tagu'areti Rantimofo Jisas Kraisi Nefa, Anumzamofona ragi amisune.
7E'ina hu'negu, Kraisima tamagrima tamavre'neaza huta, tamafuheina zamavareho, ana hanageno Anumzamo'a ragi erigahie.
8Antahiho, Anumzamo'ma Israeli vahe'mokizmi nezmageho huvempa huzmante'nea kea eriama hanige'za kesazegu, Kraisia eri'za vahekna huno zamagritera e'ne.
9Ana hu'negu megi'a vahe'mo'za Anumzamo'ma asunkuma huzmante'nea zankura, ragi amigahaze huno avontafepi krentene, E'ina hu'negu nagra megi'a vahepina rankagi negamina, nagra zgamera hu'na kagi'a erisaga hugahue hu'ne. (Sam-Zga 18:49)
10Mago'ane amanage hu'ne, Megi'a vahe'mota, Agri vahe ene musenkase hiho hu'ne. (Diu-Kas 32:43)
11Ete mago'ane amanage hune, Ramofona ragi amiho, maka megi'a vahe'mota, ana miko mopafi vahe'mota agi erisaga hiho hu'ne. (Sam-Zga 117:1)
12Ete mago'ane kasnampa ne'mo Aisaia anage hu'ne, Jesimpinti efore hanimo'a, Agra megi'a vahe'mokizmi kva mani'nenke'za, Agrite zmazama huzankura amuhara hugahaze hu'ne. (Ais 11:10)
13Fore'ma haniguma amuhama nehunazamofo Anumzamo, miko musezane rimpa fruzana tamentintifina antevi'netena, Ruotge Avamumofo hankavefi fore'ma hanigura amuhara hugahaze.
14Nafu nagnahete nagrani'a antahuana, tamagripina knare tamavutmavamo'ene mika'a antahizamo avite'nena, ozeri fatgo azeri fatgo hugahaze.
15Hianagi mago'a nanekegu avompima hankavetina kreraminoana, Anumzamo'ma asunku'ma hunante'neazanteti ete mago'ane huramagesama hanigu krerami'noe.
16Kraisi Jisasi eri'za erina megi'a vahetega prisi vahe' kna hu'na, Anumzamofo knare musenke huama nehue. Ana hanige'za megi'a vahe'mokizmia Ruotge Avamumo zmazeri ruotage hu'nige'za, Anumzamo muse huno eneria kre sramnagna hugahaze.
17E'ina hu'negu Anumzamofo eri'zama enerua zankura, Kraisi Jisasimpi knare hu'noe hu'na navufa rana hugahue.
18Mago'a zankura nagra navufga erisaga osugahuanki, Kraisi'ma nagripima erivgarenea eri'zamo higeno, megi'a vahe'mo'za amagera nentaze.
19Ruotge Avamumofo hankavefine, avame'zane, ruzahu ruzahu'za kaguvaza erifore hu'zamofo hanavere, Kraisi musenkea Jerusaleti huama hu'na Ilirikium kaziga (Masedonia-Italy) ome huvgare'noe.
20Hianagi nagra, Kraisi agima nohaza vahepi knare musenke huama hu'na zmasamisuegu, tusi'za huno navenesiankina nagra rumo'za kinaza tratera nona nonkue.
21Hu'neanagi mono avontafepina amanage huno krentene: Agri agi agenkema ozmasminesaza vahe'mo'za negesnage'za, Agri agi agenkema ontahinamo'za antahi ama hugahaze hu'ne. (Ais 52:15)
22Nagra nantuma antena eme tamagenaku'ma huana ama agafare ome'noe, na'ankure ama kumapina mono naneke huama nehune.
23Hianagi nagra ama kaziga menina hago eri'zana eri vgare'noe, hagino rama'a kafufima emema tamagesue hu'na avegama ante'noa zamo'a tusi'za huno navesie.
24Nagra Speini kumate vunaku antahintahia retro nehuankino, vanuna onsi'a kna tamagrane umaninena mono kea nehu'na, vunaku'ma hanugetma naza hanagena vugahue.
25Hianagi Nagra menina mono kevu naga museza antezmantazaza zaminaku, Jerusale kumatega nevue.
26Na'ankure Masedonia kumateti ene Akaia kumateti mono kevu'mo'za muse hu'za Jerusale kumate mono kevumokizmi amu'nozmifi, zamunte omne nagamokizmi zgo eritru hazagena erina nevue.
27Zamagra zagoma eri atruma hazazankura tusi'a muse hu'naze. Zamagrama antahizana nofi hu'nazaza katufeankna hu'naze. Na'ankure megi'a vahe'mo'za Avamumofo asomuma eri'naza zanku, Jiu vahera amega zamufamofo zmaza hu'za zami'naze.
28Hagi ama ana erizama erivanerena, ana zama zamivaretesuna, nagra Speini kumate enevanuna, eme tamageme vugahue.
29Nagra antahinoe tmagritegama esu'na, Kraisi asomumo avitenenkena egahue.
30Nafu'nganahete, nagra tamantahigoe, Rantimofo Jisas Kraisine Ruotage Avamumofo avesizante, amama amuhoma e'nerua zantera nagri'ene eme hagerefita, Anumzamofontega nunamu hunantesazegu nehue.
31Nunamu nehinkeno zmentinti osu Judia vahepintira Anumzamo nagu'nevazina, Jerusale mani'naza vahe'mo'za kema hanuana antahinamiho.
32Hanigena Anumzamofo avesizama me'nena, nagra tamagritega muse hu'na egahue. Hanigeta tagra ozeri hankaveti azeri hankaveti hugahune
33Hagi menina rimpa fru Anumzamo tamagrane manisie. Tamage.
