Roma 3:9-26

⁹Ende hi'ihehewi? Lo'o mayai ri Yahudi wa'an narehi ri ma ka namwali Yahudi? Onne ka namlolo. Naise ya aheheni nonolu, ri mormori na'akeme hi'i dohohale, de na'akeme sala lolo Makromod Lalap leken kalarna, ri Yahudi enihe roro idewe ri ma ka namwali Yahudi.

¹⁰Onne namnenehe panaeku man horokedi nonolu lolo Horok Lape raram ma na'ahenia, “Ri mahaku ka namlolo lolo Makromod Lalap kalarna.

¹¹Ri mahaku kaale ma nauroin inhawe ma namlolo kokkoo, la ri mahaku kaale ma nanoin Makromod Lalap leke lernohie.

¹²Ri na'akeme waliyedi kili'urn, de na'akeme lolo kalla man sala penia rir hini'i wenewhe namehiyala. Ri mahaku kaale man hi'i ha ma namlolo ida.

¹³Ahanhe naise lunna ma kar uine de nakpopono, ono wanakunu ma namhara nurunhe ha man ailanna la poho mamani. Namalhe wohir ha man hadwei hadwokor ri, naise haimoke ma ni'i ri ne, makiyedi.

¹⁴Nuranhe rahopo ra'aki la la'apekir ri mamani.

¹⁵Hi ranoin kalla leke pelek hi'i apinpinha ri la resne.

¹⁶Hi radedem lolo ewi-ewi hi'i nano'onyak ri, la hi'i apinpinha ri heri ri wali mamani.

¹⁷Hi ramhene ranoin kalla rahuwa'an roro ri heri ri wali,

¹⁸la ka ramka'uk Makromod Lalap.”

¹⁹Ik kauroin nahenia na'akeme man horokedi lolo Makromod Lalap Nin keneri hono'ok raram na'ono ri man kokaledi keneri hono'ok onne me'e. Horok Lap raram konohi maika nahenia ri mormori na'akeme ka ramlolo, de ra'alehe wanalhan ida lolo Makromod Lalap kalarna. Ende ri na'akeme sala penia lernala hunukum.

²⁰Ri mahaku kaale man hi'i wewhe Makromod Lalap Nin keneri hono'ok noknokor penia ramwali ri molololo Makromod Lalap kalarna, maa Makromod Lalap nala Nin keneri hono'ok leke ik kauroin nahenia iknika dohohala aile.

²¹Enpenia, ors eni Makromod Lalap kukul kalla worworu maika leke ik kamwali ri molololo Ai leken kalarna. Nonolu Musa noro nabi-nabi kukunohiyedi kalla eniyeni maika haenhi. Kalla onne ik akin naili'il Yesus Kristus mehe. Ik ka kamwali ri molololo ono ik lernohi keneri hono'ok onne. Lolo Makromod Lalap kalarna ik na'akeme namnenehe,

²³ono ri mormori noho wawan na'akeme radiyaur dohohale, la rako'uwedi nano Makromod Lalap Nin or'ori dardari man ma'aruru wake'eni.

²⁴Makromod Lalap nala Nin rere'e haharu maika, de hi'i ika kamwali ri molololo Ai kalarna lolo Yesus Kristus man huri we'er ik nano dohohale nin hunukum eni, la ka napanak wanalhan ida.

²⁵Makromod Lalap Nin panaeku Yesus lernala hunukum nahinerre iknik dohohala nin hunukum, de Yesus nala kemen maki, la rarna nakliu leke na'ohu nahala iknik dohohala, horo ik akin naili'il Ai. Nonolu Makromod Lalap ka nala hunukum dohohala makun, maa newek Yesus mai mene kukul idewe Nina ahan lolo Yesus Nin makmaki. An hi'i heheni ono Ai kan pelek na'ahan la akin wa'an mamani. Enimaa An hi'i ha ma namlolo mamani haenhi, de lo'o Ai ka nala hunukum ri man hi'i dohohala, onne kan wa'an.

²⁶Ende lere Ai nala hunukum dohohala lolo Yesus kemen, An kukul maika nahenia An hi'i ha ma namlolo mamani, la Ai nodi molollo hi'i ika kamwali ri molololo Ai leken kalarna ono ik akin naili'il Yesus eniyeni.