Rom 16:3-22

³Ai kapong ngeni Prisila me Akwila, chienei kewe chon angang lon ewe angangen Kraist.

⁴Ra amoleeretä pwe repwe ninnila fän itei. Üa fokun kilisou ngeniir, nge sap ngang chök, pwe pwal chon ekewe mwichefelin chon lükün Israel meinisin.

⁵Pwal ai kapong ngeni ewe mwichefel mi chufengen lon imwer. Ai kapong ngeni chienei mi achengicheng Epänetus, i ätewe mi akomwen lükü Kraist lon ewe fanü Asia.

⁶Ai kapong ngeni Maria, neminewe mi angang weires fän itemi.

⁷Pwal ai kapong ngeni Antronikus me Junias chienei kewe chon Juta mi etiei le nom lon imwen fötek. Ra fokun iteföüla me lein ekewe soukünö o ra pwal akom le souläng mwei.

⁸Ai kapong ngeni Ampliatus chienei we mi achengicheng lon ach Samol.

⁹Ai kapong ngeni Urpanus chienach we chon angang lon än Kraist angang, pwal ngeni Stakis chienei we mi achengicheng.

¹⁰Ai kapong ngeni Apeles, an allükülük ngeni Kraist a pwäpwäla. Pwal ai kapong ngeni chon leimwen Aristopulus.

¹¹Ai kapong ngeni Herotian, eman chienei chon Juta, pwal ngeni ekewe souläng ir chon leimwen Narsisus.

¹²Ai kapong ngeni Trifana me Trifosa, ir mi angang ngeni ach Samol, pwal ai kapong ngeni fefinei mi achengicheng Persis, neminewe mi fokun angang weires fän iten ach Samol.

¹³Ai kapong ngeni Rufus, i ewe chon angang mi iteföüla lon än ewe Samol angang, pwal ngeni inan we mi tümwünüei usun eman nöün.

¹⁴Ai kapong ngeni Asinkritus, Flekon, Hermes, Patropas, Hermas, pwal ngeni ekewe souläng mi nom rer.

¹⁵Ai kapong ngeni Filolokus me Julia, ngeni Nereus me fefinan we, ngeni Olimpas, pwal ngeni ekewe chon pin meinisin mi nom rer.

¹⁶Oupwe kapongfengen lefilemi ren ewe kapongen souläng. Chon ewe mwichefelin Kraist meinisin ra kapong ngenikemi.

¹⁷Ämi pwii kana, üa pese ngenikemi pwe oupwe afälikemi ren chokewe mi afisätä kinikinfesen lefilen aramas o atoka än aramas lükülük, ir ra ü ngeni ekewe kapas sia aiti ngenikemi. Ousap chiechi ngeniir.

¹⁸Pun chokewe mi föri ei sokun föför resap angang ngeni Kraist ach Samol, nge ra angang ngeni püsin inisir. Ren ar kapas motoutou me kapas amichimich ra atupu ekewe aramas mi miritimang.

¹⁹Aramas meinisin ra rongorong usun ämi aleasochis ngeni ewe Pworausen Manau, iei popun üa pwapwa usumi. Üa mochen ämi oupwe miritikai ngeni met a mürina, nge oupwe miritimang ngeni mine a ngau.

²⁰Iwe, Kot, i popun ach kinamwe, epwe müttir apachacha Satan fän pechemi. Ümöümöchün ach Samol Jesus epwe nonom remi.

²¹Timoty, chienei we chon angang, a kapong ngenikemi, pwal Lusius, Jason me Sosipater, ir chienei kewe chon Juta, ra pwal kapong ngenikemi.

²²Ngang Tertius, ewe mi makkei ei toropwe, üa eäni ewe kapongen souläng ngenikemi.