Oromɛ Shɛɛn 16:3-22

³Yi Pirisili ni wu poo Akilasi shaari! Nɛ kapyebyeɲii pu wa pii Yesu Kirisa wo kariɲɛɛgɛ ki funŋɔ ni.

⁴Pee pʼa nɛ shɔ, fo jɛɛrɛ la kaa ya fɔ puyɛ pyaa munahaa di gori li ni. Nɛ yɛ nigin ya ta pu shaari wɛ, ga shi wusama wo egilizii pu bɛɛri pʼa pu shaari.

⁵Nʼa daa fɛɛ piimu bɛɛri pʼa puyɛ pinnɛɛ pee yíri ge, yi pee bɛɛri shaari! Yi na taanɲii Epayinɛti bɛ shaari! Wee wʼa pye shɛnshiimɛ na sɔɔ Kirisa na Azi fiige ki ni.

⁶Yi Mariyama bɛ shaari, wee wemu wʼa labye niɲɛhɛmɛ pye yi mu ge.

⁷Yi Andoronikusi ni Zhuniyasi yɛ shaari! Pee ɲɛ na shi shɛɛn, na nɔhɔ pye na kaso pyeɲii bɛ sanha. Pu bɛ kaa ya cɛ fo xuuni tudunmɔɔ pu tɛ ni, pu da nɔhɔ dà bɛ Kirisa na nɛ ɲaha na.

⁸Yi Anpiliyasi shaari, nɛ taanɲii wu ɲɛ wii Kafɔɔ wo kariɲɛɛgɛ ki funŋɔ ni.

⁹Yi Urubɛn shaari, wee ɲɛ wù labyeɲii Kirisa wo kariɲɛɛgɛ ki ni. Yi na taanɲii Sitasisi shaari!

¹⁰Yi Apɛlɛsi shaari, wee nɔhɔ ya wolo xuuni Kirisa mɛgɛ ki wuu na, ga, a wu mɛsaaŋa ta. Yi Aritobuli puga shɛɛn pu shaari!

¹¹Yi Hɛrɔdiyɔn shaari, na shi shɛn we. Narisisi puga shɛɛn piimu pu ɲɛ Kafɔɔ wo kariɲɛɛgɛ ki ni ge, yi pee bɛ shaari!

¹²Yi Tirifɛnɛ ni Tirifozi shaari, pee cèe shuun we, pee ya puyɛ pɔ Kafɔɔ wo labye wu na. Yi wù ceboroshɔ wù taanɲii Pɛrisidi bɛ shaari, wee bɛ ya la pye xuuni Kafɔɔ mu.

¹³Yi Urufusi shaari, Kafɔɔ ya wemu ɲaha bulo ge. Yi wu nu wu bɛ shaari, wee wemu nɛ bɛ ya wii na nu ge.

¹⁴Yi wù fò kan Asɛnkirite ni Filegɔn ni Hɛrimɛsi ni Patorobasi ni Hɛrimasi mu! Wù cebooloo piimu bɛ pu wa pu yíri ge, yi wù fò kan pee bɛ mu!

¹⁵Yi wù fò kan Filologi ni Zhuli mu, ni Nɛrɛ ni wu ceboroshɔ, ni Olɛnpe. Nʼa daa fɛɛ piimu bɛɛri pu wa pu yíri ge, yi pee bɛ shaari.

¹⁶Yʼa yiyɛ shaari ni fɛfɛɛrɛ taanɲɛɛgɛ fò ni! Kirisa wo egilizii pu bɛɛri ya yi shaari.

¹⁷Ayiwa na cebooloo, kalaa wemu yee ya ta wèe mu ge, piimu pʼa wee she, na ganha na nʼa daa fɛɛ pu waagi, na pu ɲuyɔ kyɛɛgi ge, na yi ɲɛɛri jo yʼa yiyɛ kasɛri pee na. Yi sii laraga yaha pu mu!

¹⁸Bani pee sipyii pii ɲɛ wù Kafɔɔ Kirisa wo kapyebyii wɛ, ga pu yacɛrɛɛ taɲiŋɛ pu ma zhaa. Sipyii piimu pu ɲɛ pu ya nʼa daa wu keree cɛ xuuni-i ge, pʼa ganha na ɲɔtanga jomɔ ni kafila lɛlɛɛgɛɛ taga na pee faanna.

¹⁹Ga yee kunni, yee ya Kilɛ ɲɔmɛɛ co cogana lemu na ge, sipyii pu bɛɛri wa lee cɛ. Lee wuu na nɛ funŋɔ taan xuuni yee shizhaa na. Na funŋɔ ki wa yʼi bye fungɔnyɔ fɛɛ, yi da kasaaŋaa pyi, yʼi bye fɛɛfɛɛ, kakuunɔ la shishiin ganha ba ɲaa yi nibyegee ki ni wɛ.

²⁰Ayiwa, jɛri funŋɔ ni ɲaɲiŋɛ fɔɔ Kilɛ wʼa da ba Shitaanni wo sefɛɛrɛ ti bɛɛri kyɛɛgi na yeege yi tɔɔyɔ ni. Wù Kafɔɔ Yesu Kirisa wu niimɛ kan yi mu!

²¹Na kapyebyeɲii Timote ya yi shaari, ni na cebooloo Izirayɛli shɛɛn, pee piimu pu ɲɛ Lusisi, ni Zhasɔn, ni Sosipatɛri ge, pu bɛ ya yi shaari.

²²Ayiwa, Tɛritusi wemu wʼa we sɛmɛ we ka nɛ mu ge, wee bɛ ya yi shaari Kafɔɔ wo kariɲɛɛgɛ ki ni.