Romanos 16:3-22

³Ñatac allin willacuyćhu lulä-masí Priscilactawan Aquilacta limaycäliy.

⁴Yanapämayninwanmari bïdantapis ñaćha apälälila. Chaymi ya'apis jinantin mana-Israel chalapacü-masinchiccunapis sulpäta uculcá.

⁵Chaynütac paypa wasinćhu juntunacü chalapacü-masinchiccunactapis limaycäliy. Chaynütac Asia-lädućhu wamä chalapacü cuyaśhá chalapacü-masí Epenetoctapis limaycäliy.

⁶Amcunapä ancha lulaycuyä Mariactapis limaycäliy.

⁷Chaynütac malca-masí wićhalä-masí Andronicoctawan Juniastapis limaycäliy. Paycunam ya'apïpis puntacta chalapaculcäla, jinaman puydï caćhacunäpäpis sumäninmi caculcan.

⁸Chaynütac Jesusninchicćhu cuyaśhá chalapacü-masí Ampliastapis limaycäliy.

⁹Jesusćhu lulawshï-masinchic Urbanuctapis limaycäliy. Jinaman cuyaśhá chalapacü-masinchic Estaquistapis limaycäliy.

¹⁰Chaynütac chalapacuyninta achca cuti sumäpa camalaycachï Apelestapis limaycäliy. Aristobulop aylluncunactapis limaycäliy.

¹¹Malca-masí Herodiontapis limaycäliy. Chaynütac Jesusman chalapacü Narcisop aylluncunactapis limaycäliy.

¹²Chaynütac Jesusninchicpa lulaycuyta callpanchacü Trifenectawan Trifosactapis limaycäliy. Chaynütac allin willacuyćhu sumä sirbiycü cuyay paní Persidactapis limaycäliy.

¹³Chaynütac allin sirbï Rufoctapis, jinaman mamä-yupay cä mamantapis limaycäliy.

¹⁴Chaynütac Asincritocta, Flegontesta, Hermesta, Patrobasta, Hermasta, jinaman paycunawan cä chalapacü-masinchiccunactapis limaycäliy.

¹⁵Chaynütac Filologoctapis, Juliactapis, Nereoctapis panintinta, jinaman Olimpiactapis, chayćhu lluy cä chalapacü-masinchiccunactapis limaycäliy.

¹⁶Lluypis sumä cuyacuywan limanacaycäliy. Cayćhu Salbacüninchic Jesusman llapallan chalapacü-masinchiccunam limaycälimuśhunqui.

¹⁷Chalapacü-masïcuna, mañaculcac iwichïcunäpi, laquichïcunäpi, sumäta licaculcänayquipämi. Paycunam yaćhachipäcuśhacpi iwïshacunacta yaćhachipäcun. Chaycunapi japächaculcay.

¹⁸Chay nunacunaca Duyñunchic Jesustachu manam sirbipäcun, sinu'a quiquinpa munaynintamari. Chaymi mana tantiayniyu cäcunäta tuqui mishqui allin-nilä limaycunallawan pantächin.

¹⁹Ñatac amcuna uyalicü-cama capäcuśhayquitá lluymi yaćhapäcun. Chaymi sumä cushicú. Ñatac munaycú allincäpä tantiayniyü-cama caycälinayquitam; mana allincätañatac uchuyllapis mana lulaycälïcama caycälinayquita.

²⁰Jawcacta uycü Tayta Dios ćhaquiquiman Satanaśhcäta jalünanpä ashllañam cacuyan. Jesusninchicpa llaquipaynin amcunawan caycuchun.

²¹Ñatac lulawshï-masí Timoteopis, malca-masí Luciopis, Jasonpis Sosipaterpis, limaycälimuśhunquim.

²²Chaynütac Pablop cay cartanta ya'a isquirbimü Terciopis limaycälimucmi.