ROMUDEENƆ 16:3-22 - Luda yã takada kↄ̃n Bokobaru yão

³À ì kpá Pirisila kↄ̃n Akilaoa. Ma zĩkɛri daanↄmɛ Kirisi Yesu zĩi guu.

⁴Aↄ̃ sì wà ń zĩnda da kari guu ma yãnzi. Èe kɛ mámbe madoro, bori pãnde sↄsinↄ gbɛ̃nↄↄ e ń sáabu kpaa píngi dↄ.

⁵À ì kpá sↄsi gbɛ̃ kɛ̀ aↄ̃ègↄ̃ kↄ̃ kaakↄ̃a aↄ̃ bɛɛ guunↄa. À ì kpá ma gbɛ̃ yenzide Ɛpɛnɛtua, àmↄ kɛ̀ à Kirisi náanɛ kɛ̀ Asia bùsun káaku.

⁶À ì kpá Mariamaa, àmↄ kɛ̀ zĩi kɛ̀are maamaa.

⁷À ì kpá Andarↄnikua kↄ̃n Yuniao. Ma bori daa kɛ̀ wà wa da kpɛ́siaan lɛdoonↄmɛ. Aↄ̃ tↄ́ bↄ̀ Luda zĩ̀rinↄ tɛ́ bensↄ̃ aↄ̃ↄ kú Kirisi guu ma ã.

⁸À ì kpá Ampliatu kɛ̀ dɛ ma gbɛ̃ yenzidee ũ Dii guua.

⁹À ì kpá Ubanu kɛ̀ dɛ wa zĩkɛri daa ũ Kirisi zĩi guua kↄ̃n ma gbɛ̃ yenzide Satakio.

¹⁰À ì kpá Apɛlɛ kɛ̀ à zɛna gbãa Kirisi guua. À ì kpá Arisitↄbulu bɛdeenↄa.

¹¹À ì kpá ma Yuda daa Hɛrↄdiↄ̃a. À ì kpá Nasisu bɛdee kɛ̀ aↄ̃ↄ kú Dii guunↄa.

¹²À ì kpá Tirifɛnaa kↄ̃n Tirifosao. Nↄgbɛ̃ pìnↄ è zĩi kɛ Diinɛ maamaa. À ì kpá Pɛsia. Nↄgbɛ̃ yenzidee pì zĩi kɛ̀ Diinɛ maamaa.

¹³À ì kpá Rufu kɛ̀ bↄ̀ ado Dii zĩi guua kↄ̃n à da kɛ̀ mɛ́ɛ gwaa ma da ũuo.

¹⁴À ì kpá Asinkiritua kↄ̃n Flɛgↄ̃o kↄ̃n Ɛmɛsio kↄ̃n Patarobao kↄ̃n Ɛmasio kↄ̃n ń Yesude daa kɛ̀ aↄ̃ↄ kú lɛdoonↄ ń píngi.

¹⁵À ì kpá Filↄlↄgua kↄ̃n Yuliao kↄ̃n Nɛrɛuo kↄ̃n à dãreo kↄ̃n Ɔlimpao kↄ̃n Luda gbɛ̃ kɛ̀ aↄ̃ↄ kú lɛdoonↄ ń píngi.

¹⁶À ì kpákↄ̃a kↄ̃n Luda gbɛ̃nↄ lɛ́pɛmmanao. Kirisi sↄsinↄ ì kpàawa ń píngi.

¹⁷Ma gbɛ̃nↄ, mɛ́ɛ ooare à làakari kɛ gbɛ̃ kɛ̀ aↄ̃ bↄ̀ yã kɛ̀ á dàda kpɛɛnↄzi. Aↄ̃è gbɛ̃nↄ kɛ̃kↄ̃a wà gbɛ̃nↄ sãsã. À kɛ̃ḿma,

¹⁸zaakɛ gbɛ̃ beee takanↄ è dↄ wa Dii Kirisiziro, sé ń gbɛɛ yã. Aↄ̃è taarisaideenↄ sãsã kↄ̃n lɛ́nnaao kↄ̃n yãdↄ̃ↄo.

¹⁹Baade píngi a mìsiɛna Diinɛ baaru mà. Mɛ́ɛ pↄnnaa kɛɛ a yã musu. Má yezi àgↄ̃ à maa ↄ̃ndↄ̃ↄ vĩ àgↄ̃ taarisaideenↄ ũ à zaaa musu.

²⁰Luda Aafiade é Setãn dúgu zↄ̃ a gbá gĩzĩ tia. Wa Dii Yesu gbɛ̃kɛɛ kɛare.

²¹Ma zĩkɛri daa Timↄti kↄ̃n ma bori daanↄ Lusiu kↄ̃n Yasↄ̃o kↄ̃n Sosipatao ì kpàawa.

²²Mamↄma Tɛtiu kɛ̀ ma takada kɛ̀ kɛ̃̀ ì kpàawa Dii guu.