Rom 16:3-22

³Mulor saran anuka marmaris tetek e Prisila pa anuna barsan e Akuila, ning mitol titol taum ana titol ane Karisito Iesu.

⁴Dia alaun pas iau ning a tarai la mang sur lar umkol iau, pa bel dia nuk pas anundiau a lalaun. A atong wakak kol tetek diau, pa bel iau ka, a tarai a lotu rop ning bel na tarai Juda, la otleng la atong wakak tetek diau.

⁵Mulor saran anuka marmaris otleng tetek a tarai a lotu ning la sira lotu taum ting na nundiau a rumai. Mulor saran anuka marmaris tetek a halik e Epainetus, i a ningnigo na barsan mitimo na papar Esia ning i lingir a nuknukna pa i tortorot o e Karisito.

⁶Mulor saran anuka marmaris tetek e Maria, esaning ka titol rakrakai pas tetek mulo.

⁷Mulor saran anuka marmaris otleng tetek e Andronikus pa e Junias, naur a maik ning dia kes taum pas hok ting na rumai a dodot. Na arpotor ana aposella a risandiau i rarang. Dia naur a te Karisito nigo tak.

⁸Mulor saran anuka marmaris tetek e Ampliatus, ning a mang kol suri ana risan a Leklek.

⁹Mulor saran anuka marmaris tetek e Urbanus, ning a tena titol taum hok ana titol ane Karisito, pa mulor saran anuka marmaris tetek a halik otleng e Stakis.

¹⁰Mulor saran anuka marmaris tetek e Apelis, esaning di tohoi pa i apuasa i mang i a tena tortorot momol o e Karisito. Pa mulor saran anuka a marmaris tetek la ning miting na rumai ane Aristobulus.

¹¹Mulor saran anuka marmaris tetek e Herodion, a maik. Pa mulor saran anuka marmaris tetek la miting na rumai ane Narsisus ning la anuna Leklek.

¹²Mulor saran anuka marmaris tetek e Tripina pa e Triposa. Naur a hane ne dia titol rakrakai ana titol anuna Leklek. Pa mulor saran anuka marmaris tetek ning a halik otleng e Pesis, a hane ning i titol rakrakai kol ana titol anuna Leklek.

¹³Mulor saran anuka marmaris tetek e Rupus, ning a Leklek i aslang pasi. Pa mulor saran anuka marmaris tetek e tana otleng, ning i nangan iau arlar ot o e nang.

¹⁴Mulor saran anuka marmaris tetek e Asinkritus, Plegon, Hermes, Patrobas, Hermas pa a tastasindala otleng ana tortorot ning la kes taum onla.

¹⁵Mulor saran anuka marmaris tetek e Pilologus pa e Julia, Nereus pa e tasna hane, pa e Olimpas, pa a taraila rop ane God ning la kes taum onla.

¹⁶Ning mulo arsongo mulor maris artalai mulo ana argoro na marmaris, pa mulor toli ana totoh na toltol. A tarai a lotu ane Karisito miting na hananuala rop la saran anunla marmaris tetek mulo.

¹⁷Na tastasikla, a nunung mulo sur mulor atumarang mulo kusun a tarai ning la sira pagal asauran a tarai a lotu, pa la atong a warwarala ning i sairas a asasaerla ning mulo ka kibas pasi. Mulor han masik kusun la.

¹⁸A ngas a tarai ning, bel la mur anundala Leklek e Karisito. La mur ot a nuknuk na palaonla. La warwara ana namnamin na warwara pa a warwara na agasgas, sur lar asobor a tarai ning bel la tastasman wakak.

¹⁹A taraila rop la talapor ana numulo a longor tetek a Leklek, i maining a gas kol o mulo. Ika, a mang sur mulor tastasman wakak ana asaning i wakak, pa gong mulo alasan mulo ana asaning i laulau.

²⁰Pa e God, esaning a kama bal molmol, milau ma ir pas gingini e Satan nahai a hamulo. A marmaris anuna nundala Leklek e Iesu ir kes taum o mulo.

²¹E Timoti, esaning mia titol taum ana titol ane Karisito, i saran anuna marmaris tetek mulo. Pa natola maik otleng, e Lusius, Jeson pa e Sosipater, ditol saran tar anunditol a marmaris tetek mulo.

²²Iau otleng, e Tertius, ning a tumus a warwarala ane Pol ana pas ne, a saran anuka marmaris tetek mulo ana risana Leklek.