Rom 15:9-21

⁹To nhaft, womt duka memor, “Yimam yuhuwaf-hato nrfa htiyakyuk yimar aikahtr yima tangim htiruhamn Bro Nkifrar kfo yindhorrahm.” Bro Nkifrarhu rfa borngt to kfo kamukt, “Na yima tangimpno ninhu yufat yutahato kfo yindhorruha. Yo ninhu yufat yutahato windoh yindhorruhann.”

¹⁰Yo wom mrokfot kfo kamukt, “Niko yima tangiko, Bro Nkifrarhu frikefthu tuhan yindarspno rpat yindhorkfot!”

¹¹Yo tfit wom tkittn wom mrokfot kfo kamukt, “Niko yima tangi bugako Bro Nkifrar yuta yindhorkfot. Niko yima bugako windoh yindhorkfot.”

¹²Tfit Aisaiarn wom mrokfot kfo memor, “Kto Jesirhu frikeftn wom yimar sinyaruharn king tohrahr. Nd yimarn king tohhato kmi kmim yakitoh bugarahrm. Nd yimarn yima tangiroh dukefm yukatohrahm.”

¹³Hifa rhu nmbuhathu yak nmbuhat bi tu Bro Nkifrarn mrokfot kfo htamort. To be nom ndtn dukahato toh gari hasiwunom. Niko nd ror kfo htamo mrokfot duka duka toh gari hasiwatko na kanga tu Bro Nkifrarhu Yafothatn hifa yindhor rifhur ahikahtrko yima yuhum mirhurahmko.

¹⁴Bar yinouroko, nd wom yimaroh hifa hifa yak marnya nmbuhat, nanhu bro htiyeft htita bi kak bugewukomt. Nd riduka adukayefm bi kekwokomm. Nikomn womm yak hta nuhas bonuhasrfokomm.

¹⁵Na gontwat htayuk mrokfom wom kfo nnhu mrokfom htiwa. Mirahko nd mrokfom htineft ayak bebnomm. Kanga, Bro Nkifrarhu dukeftn wahikko. Ndnetann kfo nnhu mrokfom kfiwanko yo nhaft nd hingrneft nann Bro Nkifrar htamor.

¹⁶Nann yima tangikompno tohhato Jisas Kraisrhu gutniuskfot kfo ptha nuhaswanko. Nann prism hingrnamoa hingrneft kanjo niko yekwoyanko Bro Nkifrarpno hanitanko yimam tarioh mthayuk yemrom yaknihato Bro Nkifrar hanyhemoa kanjo. Be rorpno hanitatanko rorn turhu Yafothat thu hmbritarko be turhu bugako korhko.

¹⁷Na hingrnewa hingrneft Krais Jisasrpno yak tkafhato hingrniwant. Na tuka yindhorwa nd hingrnefthu hingrnaneft.

¹⁸Nhai na wom tamoh mrokfom ptharhota. Na rorhu hingrneft tohmohat htimoya tu Kraisr toh nhomoatra tamoh tamoh nefm be rorhu tirtn mrhunimoum. Yo nhaft htimoya tamoh tamoh nefm Bro Nkifrarhu Yafothat nhai frtrohrmoata. Rotn thu bmtamouta tamoh tamoh nefm. Nd wonk wonk miraker nefm na mthu nawohhato namoam memour, “Yima tangim hti yuhurhato Bro Nkifrar hikrahm.” Nd dukeftn nd wonk wonk nefm namourm. Na gutnius ptha nuhasneft rihingrnakmohat tuha Jerusalemrn hingrnakhato kmi kmi hingrnahany, wuroht Ilirikum profinsn mihingrna tmbhomoya.

²⁰Na Kraisrhu gutnius mrokfot wany juha yimampno yihato mrokforoh yi kfo ptha nuhasneft yindhor mifwa. Na wofnkaha bi wom yimamn wohnfa rahum kasinyahato na kto yauyak-nihato wohnfa rafonm thu tabotruthato hegir kiyaknikfot.

²¹Na kanga Bro Nkifrarhu rfa borngt kfiwa mrokfo yuhatn ahika: “Yimam rorhu mrokfot tafi wany juham htirahmr. Yo yimam rorhu mrokfot wany juham turoh nyingaye hti switrahm.”