Rom 11:1-22

¹Ya eme jo lelen anya, sebwe Kindrei baseken iri lau tan bwe nadeh? Bwe, handru en! Jo dah badeh, ndraye Isra-el amwenen, lundriye Abraham badu boho kamen ta Benjamin.

²Kindrei badeh, winiyan bakahei iri Isra-el bwe, tasah ndra mwena mwena ndra-au iy tanan ta iri badeh, lau tan amwenen. Aha bala tana aha bwe? Tarou mene torowenei udu bolo buk ndrabun asehek nyala Alaija mene ibolosen ma iy asalom i ta Kindrei ma iy asehek kandriyen tiri Isra-el i buku doh,

³“Laban, iri mene ndradai iri propet tam, ma ndratokosei mada koto-ok tam ta salom ndra-au; eme ma jo le ari erah, ya iri anya kadai jo ale.”

⁴Ya eme Kindrei tiye sasah i tan? “Bwe, jo ndrasolo-ei iri lau ma ndru tuluwi (7,000) iri mene batehei bwili ndru-u iri bala andri ta Ba-al bwe, ndrame tek.”

⁵Ya eme na len dah i le buku aliy, na tikisiy ta Kindrei le, iy solo-ei oro rayah le tawi oro areu.

⁶Iy atehei tikisiy badeh, i kati budon tan, ya buku iy anya kasolo-ei ndramak badeh, iy ba-en hamon ta lahou ndramak amekes doh bwe. Tasah, ki buku none Kindrei kasolo-ei ndramak ki-in hamon le ta lahou iy amekes, idah kameh tikisiy tan ari moson bwe.

⁷Ya, asah i buku doh: Iri Isra-el anya katakaleh san ta Kindrei kaloh iri mwasin mara-ei ta madan, arile iri batakalahei bwe. Arile, iri lau rayah le Kindrei solo-ei iri badeh, iri ndruniy. Ya iri mara-ei badu hawe oro nane doh, Kindrei mesekei ndrine iri abadok ta iri winiyan banuhun sahou tan bwe.

⁸I buku none ndratorowenei mene ndra-au anya, “Kindrei badeh, wahei budon tiri Isra-el, ma mesekei mada iri agwah ta anyolom lakou, hawe ndranye iri ulun ta anuhun kon, eme, eme, taku na len dah.”

⁹Ma Debit ale tiye anya, “Ya abo, jo aseken nyamon tiri ki buku lakou ta wahei iri; ki buku nyamon udu ta samek hawe udu ta lolohon kawahei iri kala kasukik, ma ki buku bek iri kato-ak ma kataku bwele-en, ya iri lakou doh kasahan tiri ta amekes oda iri kakohok sisi-in ta kandriyen ndra-in tiri.

¹⁰Ya abo, jo aseken lakou kawahei mada iri kagwah, ma iri sanyolom kon eh, ma hawe ndruwi kona iri kihun kudu le buku don eh.”

¹¹Ya eme jo ndremenya ja anya, na len iri Isra-el ato-ak ma taku mene, iri ndrandra-i mara-ei, deh bwe? Bwe! Arile iri atehei kona iri i ta Kindrei, ma iri amekes karei ma lomondra ndra-in. Eme, ta katin doh, Kindrei eme aseben iri lau badu leheleh. Budon tan badeh, iy aseken iri Isra-el kanyolom kandriyen tan ta tikisiy i tiri lau badu leheleh, ma eme iri Isra-el ame, ya mada iri alikis ta aliy.

¹²Na len iri lau badu Isra-el atehei kona iri i ta Kindrei, Kindrei le aseben iri lau badu kon munyak. Handru, na len iri Isra-el atelei ma bakohok nyosowan ta Kindrei bwe, iy mesekei iri lau badu leheleh akohok nyosowan solo-an labai ja. Ya, ta seleya ta aliy badeh, i buku doh: I buku none iri Isra-el katubuni kandriyen tiri ma kame hamon hawe Kindrei ja, idah kameh, nyosowan solo-an labai mwasin ja winiyan eme la-u lau mari badu leheleh ma badu Isra-el ale.

¹³Ya sasah, sasah kasahan, aha ndratanan ta jo badeh, aposel ta atiye sahou ta ewek taha lau badu leheleh. Kindrei suni jo dah ta amekes lahou tan, ma jo sekesek ma aseken iri lau kanyolom gok jo amekes dah.

¹⁴Tasah, jo abudon i san doh, kameh winiyan mesekei iri lau badu hawek, iri Isra-el kameh, mada iri alikis ta aliy. Ma idah kameh, winiyan sebenei iri rayah ado mwasin.

¹⁵Ya kabatana len doh mene Kindrei baseken iri bwe badeh, mesekei iri lau badu kon munyak asahan kawas ta Kindrei. Eme ma, i buku none len ta aliy kasahan, ya Kindrei kaseken iri Isra-el kame hamon ja, idah kameh, ki buku sah bah? Idah kameh, iri sekesek tinan labai, i buku none iri amak ta imek ame loken.

¹⁶Ya, sahou sokek i buku doh: I buku none ou amekes jabi ramen, ano ou andrei ari ma mwena, ou adeu i ta Kindrei i nyara ndramas badeh, jabi ramen mari ndra tan kabwe. Ma, i buku none kandro kei katehei ki ndramas ki ta Kindrei badeh, ma andran mari kili hawen ale. Idoh leheya buku, bwena mene, Abraham hawe tubu iri Isra-el rayah ndratehei iri ndra ta Kindrei. Eme ya, udu hamon ja, iri lundriye Isra-el kameh ame hawen ale.

¹⁷Iri lau badu Isra-el badeh, i buku kei olip ateh udu bolo bilin. Kindrei eme tubwani andran rayah ma akahei iu. Ya, aha lau badu leheleh badeh, i buku andra kei olip ateh laleyah udu bolo lokei. Eme aha andra olip saniy badu bolo lokei doh badeh, Kindrei andrei aha ala ya tabahani aha ahas ala bada ndro-o andra olip rayah nane udu bolo bilin. Ma eme gwa edek bolo kandron eme ma nyohonei bakatabadah dah akuk ma andra iri basara bwe, uru asahan ari buruwen.

¹⁸Eme ya aha andra olip ta bakatabadah, mada aha sandra-i sala toro andra olip udu bilin ibok mene, ndri-iy. Tasah, aha badeh, andran laleyah; aha akohok nyosowan ma boto-on badeh, edek udu ta kandron le. Kandron badeh, balelei aha bwe.

¹⁹Ya, i buku none ou asehek anya, “Iy ndrasani oro andran kede-eh ndrame andri, tasah iy anya katabahani jo kili bada ndro-on oh.”

²⁰Handru, arile ou anuhun! Oro mene abok a andri tasah oro batehei budon handru toro bwe. Arile ou ales boto-on ta lakou ari le, ta budon handru tam. Ma ou sabudon anya ou ndra ari ai, ndri-iy; ou abudon ou, ma ou anoh.

²¹Ou abudon! Kindrei mene sani iri Isra-el rayah ame andri, i buku ndramak sani andra kei olip amwenen. Ya eme ou ale kameh, buku ou ruwani budon tam handru, iy winiyan sani ou ame andri ale.

²²Ya eme ou none seleya se, Kindrei amekes kandriyen mwasin labai i tiri lau, arile iy ale edeu maha-an i la-u iri ma tiye sahou nyarahan ale. Iy edeu maha-an i la-u iri mene taku, arile iy amekes kandriyen mwasin ewek tam, i buku ou adek amwenen ala le bolo kandriyen mwasin tan. Bwe kameh iy kasani ou ame andri ale.