Romu 11:1-22

¹Hagi amanage hu'na nehue, Anumzamo'a Agra'a vahera avesra huzmantenefi? I'o anara osugahie. Na'ankure nagranena Israeli nere, Benjamini nagapinti Abrahamu negehone.

²Anumzamo'a Agra'a vahe korapa huhampri'zmante'nea vahekino ozmatre'ne. Ontahi'nazafi mono Avontafe'moma kasnampa ne' Ilaijanku'ma hu'neana? Ilaija'a Israeli vahekura amanage huno Anumzamofontega nunamuna hu'ne,

³Ramoke, kasnampa vahe'ka'a zmahe nefriza, kre'sramna vu itaraminka'a tgana vazinetre'za, nahe frinaku nagrake mni'noge'za nehakraze. (1 Kin 1:10)

⁴Hu'neanagi na'ane huno Anumzamo'a ke nona'a huntene? 7 tauseni'a vahera, Bali havi anumzantera zmarena reza mono huonte'namokizmia zmazeri frakuge'za mni'naze. (1 Kin 19:18)

⁵E'inahu kna menina hu'ne. Maka Israeli vahe'mo'za Anumzamofona zmagena humizafinti, osi'a naga Anumzamo'a asuragi zmanteno huhampri zmantenemo'za mni'naze.

⁶Hagi Anumzamo'ma asunku huzmanteno huhamprima zmantene'sniana, e'i eriza enerizazante anara osu'ne. Hagi eri'za enerizazantema huhamprima zmante'simpga asuntagizamo'a, asuntagizana omnesine.

⁷Hagi na'a fore hu'ne? Israeli vahe'mo'za fatgo vahe manisune hute'za ana'ana hu'za vu'nazanagi, fatgo vahera osenazanagi, huhamprima zmante'nea vahe'mo'za fatgo vahera sazageno, ruga'amokizmia zmarimpamo'a hanavetige'za, Anumzamofo kea ontahi'naze.

⁸Avontafepi krenteneana, Anumzamo'a zamazeri zmavutoko hu avamu nezmino, zmavua onke'sazegu reso nehuno, ke ontahisazegu zmagesa renknirege'za, ontahiza manime e'za ama knare ehanati'naze. (Diu-Kas 29:4, Ais 29:10)

⁹Hagi Devitia amanage huno hu'ne, Zmatrenkeno rama'a ne'zama ne tratema eri atru huno nezamo'a, kukomo zmazeria kna nehuno, zmagigo zmi havere tanafa hazankna nehina mizazmia eriho.

¹⁰Zmatregeno zmurgamo'a hanintiri nehinke'za nonkeza, zmagenamo fagagina pri hute'zage maka kna mniho. (Sam-Zga 69:22-23)

¹¹Mago'ane zmantahinegoe, Israeli vahe'mo'zama tanafa hu'za traka hu'nazana ete oraotinaku traka hu'nazafi? I'o trakama hu'nazana otigahaze. Hu'neanagi Anumzamofo zmefi humiza nona'a, Anumzamo'a megia vahe'mokizmia havi avu'ava'zampintira zmaresige'za, Israeli vahe'mo'za megi'a vahera knive rezmantegahaze.

¹²Hagi Israeli vahe'mo'za kumi'ma hu'nazazamo, kokankoka vahetega marerisa asomura vu'ne. Trakama hu'naza zamo'a marerisa asomura megi'a vahe'mokizmia huzmantene. Hu'neanagi Israeli vahe'mo'za Anumzamofoma zmefima huomizasina, inanknahu asomu kokankoka vahe'mo'za erizasine.

¹³Ana maka kema nehuana, megi'a vahe'mota tamagriku nehue. Anumzamo'a megi'a vahe'mokizmi aposol manio huno huhampri'nantenegu ama ana eri'zamo'a nagripina kota eri'zani'a me'ne.

¹⁴Mago'a kankamumpinti megi'a vahe'mota tamagripi eri'zani'a enerisugeno, Jiu vahe'nimo'za kniveneresageno, zmahoke ahesiegu nehue.

¹⁵Na'ankure Israeli vahe'mo'za Anumzamofo zmefi humiza zamo, kokankoka vahera Agrane zmazeri mago zmarimpa hu'ne. Hagi inankna hugahie Israeli vahe'ma Anumzamo'ma ete zmaresnia zamo'a, e'i fripinti oti'za zmasimu erizankna hugahaze!

¹⁶Bretima krenaku heru'ma anteneza anampintima esera refko hu'za kre'za Anumzamofoma nemisageno'a, ana maka herunte'naza bretimo'a ruotage hugahie. Zafa'mofo rafunamo'ma ruotgema hu'nenkeno'a, ana maka azankunamo'enena ruotge hugahie.

¹⁷Hu'neanagi olivi zafa'mofo mago'a azankuna'aramina hantgi zmatreno, tmagrira afi olivi zafa'mofo azankuna'a mni'nazageno, tmavreno olivi zafare rukamrermantegeta amunozmifi mni'neta, zamagrane knare msavena agafafinti enerize.

¹⁸Hu'negu tamagra azankuna'a mni'none hutma rantmagia e'oriho. Na'ankure tamagra rafunamofona aza nosazanki, arfunafinti tmaza hu'zana enerize.

¹⁹Tamagra anage hugahaze, tagri rukamre'rantesnigu azankuna'aramina hantgi zmatrene.

²⁰E'i tamage, Jiu vahe'mo'za zmentinti osazagu hantgi nezmatreno, megi'a vahe'mota tamentinti hzagu tmazeri rukamre rmantene. Tamagra'agura antahisga osutma, Anumzamofonku koro hunteho.

²¹Na'ankure Anumzamo'ma olivi zafamofo azankuna'a eri hantgima zmatrenesuno'a, tamagri enena tmatresigeta omnigosaze.

²²E'ina hu'negu Anumzamofo fru avu'ava ene hihamu avu'ava'anenku tamagesa antahiho. Trakama hzamokizmia Anumzamo'a zmazeri haviza neheie. Hianagi tamagrira fru avu'ava hurmantegahie. Tamagrama Anumzamofo fru avu'avazma huta ovnageno'a, ru tamagri enena ana zanke huno hantgi tamatregahie.