Romu 11:1-22

¹Tiyarafenu ano Isareri kayo me oyan amikhará téi siya rafuno. Ída uron mino. Téi Abaraamun pinté ma ayuman ukhein Bensamenin anan bantan báke Yutan bantai vá umpo afova sá ono.

²Máan tukhékun Tiyarafenu ano fefá araí in táké ma veinaí ukhein nanin banta ída me ampikhein mino. Mai van ma vompon dóki ano sikhein tireti ídá afová ukhe fono. Sakhanampa vanta Iraiya ano Isareri nanin banta ayaino van Tiyarafenu vaípá ákonaen máa sikhen mino.

³“Bafan noe, eni sakhanampa vanta kéká minó aruan púden éin ma íkun uan amin kará kayo vá dere varakuariyan karúdará teya anan ukhékun téin má tirono van dakhafiyá uno.”

⁴Máa síkan Tiyarafenu ano ma evaránen béin tiamein mai vaya afová ukhe fono. Tiyarafenu ano semí, “Éi ída eyaká ana vaono. Dan manápá ifo afápá kan un kádan tauseni (7,000) ano ma kampun ayarafenu rá ída monó tiyain kayo vá deren para van mino.”

⁵Máan tukhan taréa minó Yutan kayo vá dere Tiyarafenu me ampikhen naino. Mai ma Tiyarafenu ano sarisari uren avíkaré ein nan manáa ano fara van mino.

⁶Máan tukhan betíi yorantasá avíken naino. Tiyarafenu ano vei sarisari rái avíken mino. Betíi dorantá ma avíkantin maen Tiyarafenui sarisari ano ída fura yanasíi inten mino.

⁷Máan tukhen mifo mai seti inte esá té tifante rafuno. Isareri kéká ano mai yaná barano van ákona yorari uvákon den mifo ída varan nainíen mino. Betíi kéká pintena mai ma Tiyarafenu aní uran ben ninaí ukharé ein máa anon baren mifo minó kayoi ineinerá dasirákaren mino.

⁸Tiyarafenui vompon dóki ano máa sikharéin mino. “Tiyarafenu ano vetin maman purin banta an daran aunká bakhen eriyaren taréa vetin aurá iyádan ída onaríin átaren dasíkaran ída vaya iniyan mino.”

⁹Devitin má dere máa sikhen mino. “Áesin ná beti ma omasí inain mano maman betíi oyivan an davintin ná anuran ariyan nain nan kana vá uno vá tino. Áesin ná mai amusin mano sin nainíen uman barano.

¹⁰Áesin ná betin auu yufúkuvintin ída vá onano. Áesin ná uman mano amininá ódiven ayorun davénarantin ná mátinten bano.”

¹¹Máa sikhen mifo mai fura sen ná Isareri nanin banta ano eraven ankanten ídá evaránen e mantanten nafino. Ída uron mino. Betí ankan ma Tiyarafenu oyan amiyain nan mi Tiyarafenu ano ena anan kéká evaránen avídantin Isareri kayo ano ódaren tetin mana sivirano van muno siren aranan ino van mino.

¹²Isareri kéká ano ma Tiyarafenu oyan amiran mai van mi ena anan nanin bantafin Tiyarafenu ano avábá amikhen mifo ínaimpáké Isareri kéká ano ma Tiyarafenu vaípá ovaránen erintin maen minó nanin bantafin beni avábá ano mo kákani suron inten mino.

¹³Mai van mi siretíena anan nanin banta ma vaona van mi séi siyá uno. Ena anan nanin bantafin baya varen orino van ma Tiyarafenu ano séin aní ukhein mai kákan doran uron mino.

¹⁴Mai fara vara seyo, Tiyarafenu ano ma sireti ena anan nanin banta kama avúavá uantan nain mano Isareri kayo auu yavo sintin Tiyarafenu ano senti yorantá betin pinte manáa ovaránen avirano van muno.

¹⁵Mai fara va ino. Tiyarafenu ano Isareri nanin banta oyan amiren mai van mi sireti ena anan nanin banta avíden avábá uanten mino. Máan ten mifo Yutan kayo ano ma Tiyarafenu vaípá ovaránen erinten maen mai fúkaren ma e manteiníi intin Tiyarafenu ano vetin moéken avábá inten mino.

¹⁶Abaraamu má Isareri kayo ma ayuman in banta kéká bá ano ma kantasí ukhantin maen mai vetin ana akhafana vá ano yeren kantasí inten mino. Inká daa arú kayo ano ma kama ukhantin maen mai yaa ayan kayo vá ano yeren mo kama inten mino.

¹⁷Máan tukhan maen Isareri kéká ano mai ayuntáke orifi yaa ana an mi yakhá en nan mi Tiyarafenu ano manáa ayan iyaren do varen mino. Do máden inká tireti ena anan nanin banta ano mai afá orifi yaa an mi yakhá en nan Tiyarafenu ano o iyaaren ayuntáke orifi yará ma asótu einíen mino. Máan turai saréa siretí ankan ayuntáke orifi ayan ma einí uveyan mai yaa fintena anu variyákeya ana variya vaono.

¹⁸Máan tukha ompo ída vá mai ma iyaan karúdakhein ayan kayo van esantakhé uno se ineno. Tireti ma máan ineine ma iyanteya mai sireti afova sá ono. Ída yaa ayan mano arúpin anu aminten mifo yaa arú anoi yaa ayampin anu aminten mino.

¹⁹Amé iyan mifo siretí ankan ída vá teya “Tiyarafenu ano mai ayan kayo síkaran bain téin maifin asotú inten mino” sire avan avan ono.

²⁰Mai fura máan tin nompo Yutan kayo ano ma ída mumunan ein nan mi Tiyarafenu ano yo síkaan karúdakhen mino. Tiretí ankan ma mumunan eona van mi maifin maman asotú ura va ompo ída vá avan avan iyákeya siretin ma Tiyarafenu ano yo síkaan karúdan nain mai vará perano.

²¹Para vara seyo, Tiyarafenu ano fefá ma varé ein daa ayan ma yo síkakhanti mae mai siretí ankan má dere yo síkanten mino.

²²Máan tinten mifo Tiyarafenu ano kamaen avábá iyáken inká ákonaen baya siyan é iyan mifo afova sá ono. Mai ma Tiyarafenu oyan amé iyain kéká béi auufen kakháben ákona vaya sé iyan mifo véin nan ma anunu ein kéká béi avové uren kama uanté iyan mino. Tireti ma véin purase oyan amesin maen béin má deren tiretin oyan aminten mino.