Romanos 11:1-22

¹Jalla niz̈tiquiztan wejrqui pewcznuc̈ha, ¿Yoozqui niiz̈ tuquita illzta z̈oñinaca chjatkatjo? Anapanz̈ cjesac̈ha. Wejrpacha Israel wajtchiztc̈ha, Abrahamz̈ majchmaatitc̈ha, niz̈aza Benjaminz̈ parti z̈oñtc̈ha.

²Tuquitanpacha Yoozqui Israel z̈oñinaca illzic̈ha. Jalla niz̈tiquiztan anaz̈ chjatkatasac̈ha. ¿Jalla Elías puntuquiztan ana cjuñjo? Elías puntuquiztan cjijrta Yooz takuqui tuz̈ cjic̈ha: Eliasqui Israel z̈oñinacz̈ ujnaca Yoozquiz tjeezic̈ha, tuz̈ cjican:

³“Yooz Jiliri, ninacaqui amiz̈ cuchanz̈quita profetanaca conchic̈ha. Niz̈aza am sirwiz altaranaca pajlchic̈ha. Wejrqui am sirwiñi zinalla z̈eluc̈ha. Ninacaqui wejr zakaz conz pecc̈ha”. Jalla nuz̈ cjichic̈ha Eliasqui.

⁴Nekztan Yoozqui Eliasquiz tuz̈ kjaazic̈ha: “Wejttajapa pakallawk warank z̈oñinaca c̈hjetzinc̈ha. Ninacaqui Baal cjita z̈oñiz̈ paata yooz yujcquiz anapan quillzic̈ha”.

⁵Jalla niz̈ta irata tii timpuquiz zakaz tsjii kjaz̈ judío z̈oñinacaqui Yooz partiquiz z̈ejlc̈ha. Yoozqui ninacz̈quiz okz̈cu, illzic̈ha.

⁶Nii criichi judío z̈oñinacaqui Yooziz̈ okziz̈ cjenkaz illztac̈ha. Jalla niz̈tiquiztan ana ninacaz̈ kamtiquiztan illztac̈ha. Ninacaz̈ kamtiquiztan illzta cjitasaz̈ niiqui, Yooz okzqui inakaz cjitasac̈ha.

⁷¿Jazic kjaz̈ cjii? Israel wajtchiz z̈oñinacaqui ujquiztan liwriita cjis pecatc̈ha. Pero ana liwriitatac̈ha. Yooziz̈ illztanacaqui ninaca alajakaz liwriitac̈ha. Parti Israel z̈oñinacazti chojru kuzziz cjissic̈ha.

⁸Jalla nii chojru kuzziz z̈oñinacz̈ puntuquiztan cjijrta Yooz takuqui tuz̈ cjic̈ha: “Yoozqui Israel z̈oñinacz̈quiz niiz̈ puntu ana intintiñi kuzziz cjiskatchic̈ha. Jalla niz̈tiquiztan ninacaqui Yooz puntu chercanpacha ana cherñiz̈takaz cjiskatchic̈ha, niz̈aza Yooz puntu nonzcanpacha ana nonzñiz̈takaz cjiskatchic̈ha. Anzta tii timpucamaz̈ niz̈ta z̈ejlc̈ha”.

⁹Niz̈aza Davidqui Yooz tawk liwruquiz tuz̈ cjijrchic̈ha: “Yoozquin ana kuzziz z̈oñinaca z̈ejlc̈ha. Yooziz̈ tjaatanacaqui ninacz̈quiz ujquiz tjojtskatla. Tsjii trampaz̈takaz cjila, ujquiz tjojtskatzjapa. Niz̈aza ninaca t'ezinla, ninacz̈ uj paatiquiztan jama casticta cjisjapa.

¹⁰Zur z̈oñinacaz̈takaz z̈ejlcan Yooz puntu ana cherñi cjila. Niz̈aza ninacz̈ tajqui chutunziz̈takaz cjila, ana walinacaz̈ tjonchiz̈ cjen”.

¹¹Jalla niz̈tiquiztan wejrqui pewcznuc̈ha, Israel wajtchiz z̈oñinacaqui ujquiz tjojtsiz̈ cjen, ¿wiñaya chjatkatta cjesajo? Anapanz̈ cjesac̈ha. Israel wajtchiz z̈oñinacaz̈ liwriiñi tawkquiz ana juyzu paachiz̈ cjen, nii liwriiñi takuqui yekja wajtchiz z̈oñinacz̈quiz paljaytac̈ha, Israel z̈oñinacz̈quiz p'ekinchayzjapa, Yoozquin kuz tjaajo.

¹²Israel z̈oñinacaz̈ liwriiñi taku ana juyzu paachiz̈ cjen parti z̈oñinacz̈tajapa zuma cjissic̈ha. Niz̈aza ninacaz̈ Yoozquiztan jaytitiquiztan yekja wajtchiz z̈oñinacz̈tajapa wali cjissic̈ha. Jalla niz̈tiquiztan Israel z̈oñinaca wilta Yooz partiquiz cjisnan tsjan juc'ant zumaz̈ cjisnaquic̈ha yekja wajtchiz z̈oñinacz̈tajapa.

¹³Anziqui anc̈huc yekja wajtchiz z̈oñinacz̈quiz chiyuc̈ha. Wejrqui yekja wajtchiz z̈oñinacz̈quiz cuchanz̈quita apostoltc̈ha. Jalla niz̈tiquiztan wejt apóstol kamaña anchal importayuc̈ha,

¹⁴wejt judío sarchiz z̈oñinaca p'ekinchayzjapa, niz̈aza tsjii kjaz̈u liwriita cjisjapa.

¹⁵Judío z̈oñinacaz̈ chjatkattaz̈ cjen yekja wajtchiz z̈oñinacaqui pertunta cjissic̈ha, Yooztan wali cjisjapa. Jalla niz̈tiquiztan nii judío z̈oñinacaz̈ wilta Yooz partiquiz risiwta cjis cjen, z̈oñinacaqui ticziquiztan jacatatchi cjisnaquic̈ha.

¹⁶Judío z̈oñinacz̈ tuquita atchi ejpnacaqui Yooz partiquiz z̈elatc̈ha. Jalla niz̈tiquiztan tsjii tjonñi timpuquiz judío z̈oñinacaqui Yooz partiquiz wilta cjisnaquic̈ha. Jaknuz̈t primir paata t'antaqui zumaz̈laja, jalla nekztan tjapa nii t'anti mazaqui zuma zakazza. Niz̈aza tsjii munti sep'aqui zumaz̈laj niiqui, nii tsijtñi muntiqui zuma zakazza.

¹⁷Tsjii judío z̈oñinacaqui munti itzanacaz̈takaz ts'ojrtac̈ha. Niz̈aza anc̈huc yekja wajtchiz z̈oñinacaqui tsjii ana pecta munti itzaz̈takazza. Pero anc̈hucqui judío z̈oñinacz̈ cjenpacha apjattac̈ha, nii zuma muntiz̈ cjen wali zakaz cjeyajo. Nii zuma muntiqui Yooz partic̈ha.

¹⁸Anc̈hucqui jalla nuz̈ apjattiquiztan, anaz̈ judío z̈oñinaca iñaraquic̈ha. Jakziltat iñarac̈haja, jalla niiqui tuz̈ cjuñz waquizic̈ha, anc̈hucqui nii sep'az̈ cjen z̈etiñc̈hucc̈ha. Ana anc̈hucaz̈ cjen nii sep'a z̈ejtc̈ha. Nii sep'ac̈ha judío z̈oñinacaqui. Cristuc̈ha tsjii judío z̈oñiqui. Jalla niiz̈ cjen anc̈hucqui ew z̈eti tanzinc̈hucc̈ha.

¹⁹Yekjapanacaqui cunamit cjec̈hani, “Nii itsanacaqui ts'ojrtac̈ha wejrnaca apjatz̈ta cjisjapa”.

²⁰Razunaz̈ niiqui. Ana Yoozquin kuz tjaachiz̈ cjen judío z̈oñinacaqui chjatkattac̈ha. Anc̈huczti Yoozquin kuz tjaachiz̈ cjen jalla nii alajakaz Yooz partiquiz z̈ejlc̈ha. Jalla niz̈tiquiztan anac̈ha mitarazi kuzziz cjeella. Antiz humilde kuzziz cjee, Yooz rispitcan.

²¹Yoozqui ana kuz tjaañi judío z̈oñinacz̈japa quintra cjissiz̈laj niiqui, anc̈hucajapa zakaz quintra cjisnaquic̈ha ana niiz̈quiz kuzzizlaj niiqui.

²²Yoozza okzñimi niz̈aza casticñimi, jalla niiz̈ tantiya. Yoozquiztan zarakñi z̈oñinacz̈japa casticñipanc̈ha. Niz̈aza niiz̈quin kuz tjaañinacz̈japa okzñipanc̈ha. Anc̈hucqui tira Yoozquin kuzzizlaj niiqui, nekztan Yoozqui anc̈huc tira okznaquic̈ha. Anc̈hucqui ana tira Yoozquin kuzzizlaj niiqui, nekztan Yoozqui anc̈hucaquiz zakaz chjatkataquic̈ha.