1Junni metronan quiran chideca lachi cuwae. Junto itsantie: —Wiruito, Diosichi yacanan, junbi insiensoca nin ponun mesacanan miquede! tie. Junbi Diosica se tibi jaca junlacanan miquede! tie niyanca jolajonunca.
2Urachi selaca mantimini mituna! Jun selacari Diosichi itonlachi cuwaca joe tie. Diosichi sen puebloca junpalu chunca palu pe fecári yalachi cuwaca joe yape yucapiyarilaquisa.
3Junni paluca tsachilaca poden josa cariyanae tie yape Diosica cuenta polarilaquisa. Laqui nenato ponun panuca poto nenalarachunae yape laqui nenae tito quiralaquisa. Tsanque laqui nenato, mili palu patsa sota chunca ma fecári Diosichi mantate palaquichunae tie.
4Aman Diosichi Pilabi ya paluca tsachilaca paca jominue. Paluca olibo peleca pato, junsi paluca lanpara chutenunca pato, ya paluca tsachilaca tsantica jominue. Ya lampara chutenun jerale tote mantamin Diosichi cale ranunca chuteca jominue. Junni olibo peleca, junsi lampara chutenunca pánato, ya paluca Diosica cuenta polariminlaca tsantica jominue.
5Junni molatiya yalaca seiton quichi latinari, yalachi fiqui forobi nechi nin lonan, puyaminla joe. Yalaca seiton quichi timinla tsanque niyato puyaminla joe.
6Ya paluca Diosichi mantate paminla joto, suwa quisa carituno podeiminla joe. Wa pica asan pi suwano podeiminla joe. Numasi munaratotiya tobi chuminlaca man quiraque man quiraque casticaquino poden jolajoe.
7Junni yalari Diosica cuenta jera polaritobi, aman totailaie. Yucanchi forochi nechi jele tintsan quiran animali lae. Junni ya animali ya paluca Diosica cuenta polariminlabe quicaato, yalaca fe loto totee.
8Junni yala puyacala cayebi tsoniralarae. Junni jun pueblobi chuminla duque seitonla joe matu to Sodómabi o Egíptobi chuminla cuwenta. Jun pueblobi ya paluca tsachilachi Miyaca corosibi toteca jominlanue.
9Junni peman ma quitsa fecári yala puyacala joe. Junca jeralela quiralaquichunae. Jerale tsachi ni, jerale tobi chuminlale nechi, jerale fiqui paminlale nechi jato, yala puyan tsominlaca quiralaquee. Yalaca menasa carilaquitue.
10Tote chuminla duque son tito, yala tala ticatiya epe cuwalaquee yala Diosichi mantate paminla numa puyalaie tito. Inla chiquilaca tsancari pasuwanaminlae tito, son tilatie puyalaie tito.
11Junni peman ma man quitsate ya puyacalaca Diosi manan jasaca mapoto mansoncarie. Junni mansonhito manwiruilaie. Junni junca quiraminla jeralela duque jele tilatie.
12Junni Diosichibi nechi sonba pacaca meralaquee. Yalaca inchi lalaide! tie. Junni yalaca pa jominlanan quiralaquinasa, Diosichica lolaie poyobi.
13Junni jun órate to duque wequee. Jun pueblobi chunca ya cura manca arajie. Siete mili tsachila puyalaie. Junni uyanla mantimini duque jele tito, jamochi chumin Diosica tsara sen mantá tan joe tilatie.
14Junni aman tsachila palu ne padeseilainae. Junnasa man ne cajoe. Yari moora ichunae.
15Junsi debi anjeli yachi tutuca quee. Junni yachi tutuca quinunsiri, sonban fiqui panunca meráyoe. Diosichi tobi nechi itsantie: Amanari mantanola joe tie. Chiquilachi Miya Diosibe ya wenteca jun Cristo tinunbe mantanola joe. Tsachila jera mantanunca yalari amana mantaca mancalaquechinae. Numatotiya mantato polelaichunae tie.
16Junni jamochi nechi tsantinunsi, palu chunca junpaluca unicala mantato chudinunbi chuminlanan, tobi jera mutsailaie. Junni Diosica se tito
17itsanlatie: Miya Diosi, nube acradeseilainayoe tilatie. Nusiri jera poden joe tilatie. Matunan jomin joto, amananan cajoto, inanan cajochunae. Nu sonban joto, mantaca cato, mantanae tilatie. Jun tenchi nube acradeseilainayoe.
18Jerale tote chuminla pailainasanan, nunan paito casticaquechinae. Numa óra fae. Puyacalaca miino óra fae sen jominla jonunca o seiton jominla jonunca. Junsi nuchi mantate nenaminlachi premioca cuwano óra fae nuchi mantate paminlachi cuwachun. Nuchi tsachila nuca duque respetaiminla jonan, yalachi premioca cuwachinae. Mantá tanlachi, epe tsachilachi, jeralelachi cuwano óra fae. Junsi jerale tote padeseisa carimin jominlaca nu manpadeseisa carino óra fae tilatie.
19Jun quiranari, Diosichi tobi yachi ya lasaie. Diosi matu mate tsachilabe jera trato quito, pila quito uraran cajonbi poca jominue. Junni uraran cajon jamobi Diosichi yabi quiraie. Junnasa aman cunta pinda quin, pa jun, cunta pan, to wequin, ronto patan, ilaie.
