APOCALIPSIS 11

1

2

3

4

5

6

7

8

9

10

11

12

13

14

15

16

17

18

19

20

21

22

¹Oraque bidii cabe naa ti gueere casi ti metru ne rabi cabe naa: ―Biasa, uluu bia' yu'du ro' sti Dios ne altar. Ne bigaba panda cusisaca laabe raqué.

²Peru cadi cu' bia' lu patiu stini ni nuu fuera, purti ma bidii Dios ni ca binni cadi judíu, ne zuutu ñee ca xquidxi Dios chonna iza aronda'.

³Zuseenda chupa xpinne de lutu chi güi stiidxa ti mil chupa gayuaa sesenta dia.

⁴Zeda aca cabe iropa yaga olivo ne iropa candeleru ni zuhuaa nezalú Señor, xpixuaana guidxilayú.

⁵Pa chu' tu gacala'dxi guniná laacabe zaree gui ndaani ruaa cabe zuzaaqui laa. Zacá zati tutiica ucaa lú laacabe.

⁶Nandxó' cabe. Zanda useegu cabe ibá' ti cadi guiaba nisa guie biá' tica dxi güi cabe stiidxa Dios. Ne laca zanda guni cabe nisa rini ne guniná cabe guidxilayú bia' tica acala'dxi cabe ne adxé adxé plaga.

⁷Peru ora ma biluxe xhiiña cabe zaree ti mani ngola ndaani dxa bizé que, zucaa lú laacabe ne zaguixhe dxí laacabe dede zuuti laacabe.

⁸Ziaana xcuerpu cabe lu calle sti guidxi ro' ra ucuá Señor stinu lu cruz. Zeda aca guidxi que casi Sodoma ne Egipto.

⁹Zuuya dxí binni laacabe chonna gubidxa aronda', binni de irá guidxi ne de irá idioma, ne qué zaná ca igaachi cabe.

¹⁰Zieche binni ma guti cabe dede zuni ca saa ne zusiga'de saa ca xiixa purti nabé bininá cabe laaca'.

¹¹Peru tidi si chonna gubidxa aronda que, zusibani Dios laacabe ne zuzuhuaa cabe ne irá ni gu'ya laacabe zadxibi.

¹²Oraque zuna diaga cabe zaní' né tuuxa laacabe de ibá', zabi laacabe: ―Laqui'ba rarí'. Ne zagui'ba cabe lade ti za nezalú cani nanala'dxi laacabe.

¹³Ne zaca ti xu ro', zanitilú tindaa de guidxi que ne zati gadxe mil binni. Nabé zadxibi ca xcaadxi binni que ne zusisaca ca Dios ni nuu ibá'.

¹⁴Racá iluxe rairopa yuuba', peru zeeda ru stobi.

¹⁵Oraque biiya bixhidxi ra izaa gadxe ángel que trompeta ucuá stale ridxi ibá', na: Ma bidxiña dxi guiaana irá xixé ni runi mandar ladxi ná Dios ne Cristu sti', ne qué ziaana dxí de guni mandar.

¹⁶Ne bizuxibi ca binni gola zuba lu trono que, bisisaca ca Dios,

¹⁷na ca': Señor Dios ni nandxó', nuu lu ne qué huayuu dxi guiaadxa lu ne qué ziuu dxi. Diuxquixe pe lii purti ma biluí' lu enda nandxó' stiu'; ma bizulú lu guni mandar lu'.

¹⁸Bidxiichi binni guidxilayú, peru ma bidxiña dxi usaba ná lu laaca' ne cuidxu cuenta cani ma guti. Zaguixe lu cani bi'ni xhiiña lu', byuí' stiidxa lu', cani biaana para lii siou' ne bisisaca lii, cani risaca ne cani qué risaca. Ne zunitilú lu cani binitilú guidxilayú.

¹⁹Oraque bixele yu'du ro' sti Dios ni nuu ibá', ne bihuinni lugar ni jma nandxó'. Uyuu xpiaani rayu, uxidxi rayu, uca ruidu, uca xu ne biaba granizu.