1Eme moczi gunusâc narehuc ʒiŋuc nazawec: “Go fahare Anuture ufuŋ â alata sâc barâ maŋnao numuhuc jueŋgopieŋ jaŋe wosec‐jopazemec.
2Ufuŋte hae ʒoŋa ine sâc mi bahuc mâc behetec fooc, i qâpuc jaŋere qikiŋnekicne. Jaŋe hâcne miti hae mosa 42 ima bahuc juniŋmu.
3“Eme no mumutaniŋ ŋicjahec‐nane ejactepe mateŋ barâ ŋic findaŋdâŋ jazahuc juhapire ʒoaŋ gie bapa 1 tauseŋ â 260 tarazejec.”
4Jahe oliwa jâc â lambe iŋucne, jahe mâreŋte Wofuŋ ere maio domakopirec.
5Ŋic moc e râsi ejactezo mume micjekickonec ʒoc waharâ ʒaocmu. Irec ŋic moczi râsi ejacterâ sipirickeocmu.
6Ŋic jahe hoere motâc henicte tâpiri jactekicne, irec mupire hoe mi hehe mâc fohame findaŋdâŋ muhuc junicmu. Erâ mupire opâzi soc eocte irec tâpiri fojacteocmu, erâ mâreŋko wiac micne momori fuaocte mupire sâc fuaocmu.
7Eme miti mumutaniŋ dameŋ‐jekic tarame hârâckonec qowi mimicnezi wefurâ râsi ejacterâ jofame hâmonicmu.
8Hâmopire ŋic jaŋe qâŋɋâŋ‐jekic behec‐jofapie hae sâkore hae ʒoŋao fonicmu. Hae irec ʒâŋe herâriehuc Sodom â Aigita mukicne, Wofuŋ‐jekic hae ijaha maripoŋko qapie hâmowec.
9Eme mâreŋ sâc ŋic gâcne, sahac hawari‐jeŋic fuŋne fuŋne â dâŋmarac‐jeŋic fuŋne fuŋne, izi qâŋɋâŋ‐jekic ʒoaŋ gie bapa jahec â moc â moc nâfocne honec‐jofahuc juniŋmu, erâ gâcnezi ducjofazo mupie qatara‐jareniŋmu.
10Eme porofete jahe ŋic boc bâʒâic‐jopapicte mâreŋne mâreŋne ŋic ʒeri bubiaŋ ehuc boreŋ nareŋ gareŋ eniŋmu.
11Eme ʒoaŋ gie bapa jahec â moc â moc nâfocne tarame Anuturaonec juju bâbâfua mâro qâŋɋâŋ‐jekicko raʒime ɋârerâ faharepic. Faharepire ŋic jaŋe honerâ bipic‐jeŋic tarawec.
12Ehame sambâŋkonec wiwira kâcqene jaherao ʒiŋuc wahawec: “Ŋohe ʒira wefunic.” Eme râsifâc‐jekic honec‐jofahapie karorac maŋko sambâŋko fepic.
13Eme dameŋ ijaha sambâŋko fepire izia homeŋ sâko bawec. Bame hae sâkoo fic gâcne, teŋkonec wâŋ irec sâc, herickehuc ŋic 7 tauseŋ jopame hâmombiŋ. Eme ɋâricne jumbiŋ jaŋe hâwic‐jopame Anutu sambâŋ rune muteŋkembiŋ.
14Tucwipezi jei jahec â moc wirawec, ine jajahecte fârine fuawec, mocjahare fokac ine biac fuaocmu.
15Eme aŋelo namba 7 eki qeŋ qawec. Qeŋ qame sambâŋko micfânâŋ sâko embiŋ, ehuc ʒiŋuc mumbiŋ: “Ʒi mâreŋ sâko mâreŋ irec Wofuŋ jujure tâpiri i Wofuŋ‐nâŋec â Kristo‐ticne ere meo fekac, eme e guriŋ bapa gie baraʒihuc juocmu sanaŋ.”
16Eme ŋicqizec 24 Anuture maio eri ŋeŋe‐jeŋicko ŋembiŋzi waha fodaperâ Anutu ʒiŋuc muhuc daŋge nunumu ecnembiŋ:
17“Wofuŋ Anutu bapafâre, jumeŋzi juekic, nâŋe go daŋge mumuteŋ egareŋgopeneŋ. Go tâpiri sâkoge qaratietec fuakac, ehuc Wofuŋ giege fuŋkerâ bataniŋkekic.
18Ŋicne ŋicne kimbeŋ qapie gore kimbeŋzi fuakac. Erâ hâmokicne jaŋere dâŋ mutaracmurâ dameŋ maickekac. Erâ kiŋaŋ qaqafâcge, porofete â mitiŋic, â araŋ bagareeŋgopieŋ fekicne wahakicne, jaŋe furine jarecmurâ dameŋne maickekac, â mâreŋ sipirickeeŋgopieŋ jaŋe sipiric‐jopacmurâ irec dameŋ mâmâc maickekac.”
19Jaŋe iŋuc epie sambâŋko Anuture ufuŋ aŋkeme qorac tapa katapa ufuŋmaŋko tâtâc fuawec. Eme izia bâbâric â micfânâŋ â ɋuŋ parandaŋ â homeŋ â hoe sanaŋ hâhâwicne fuawec.
