1Mbe mbara bigi mpeein panɨnga sɨgɨman na nɨɨŋgi. Ana suigap, santɨva rui panpanan fara muuŋgi. Mbe ana na nɨɨŋgiap, khaŋ na nzuai, “Ndu khavgip, Fhe Bakɨme Phen gum ana ofa mbui artarar panɨri. Ndu vhɨra za kha phenan rotu mbui gumgi gu mbigir vhɨrver ruemɨri.
2Ndu kha Fhe Bakɨme phena bɨngi bɨna vhen kɨrar, mbe phogi ga vhuav kav, buni nzuai ŋanen panɨ thari. Ne khaŋ muuŋgi, mba ŋaneŋ, ne harigi fhaiŋ ŋgui gumgi gu mbigi zav, phogi ga vhui ŋaneŋ ma. Mba gumgi gu mbigi, mbe zɨv, Fhe Bakɨme ŋgu bakɨme, Zerusarem, thiphogɨp kɨrim, 42 kɨni vhɨzgirga.
3Gu wo buni vhuuiŋ bun suanga guma phuni ga sararim, mani ŋgɨrga. Mani guigira kora mbui tɨva ndi khɨvi shagi shargip, mani na buni vhuuiŋ bun suaŋv kɨrim, 1,260 rari vhɨzgirga.”
4Mba gumani, mani mba oriv khageni gum mba za kha nuiana gari Guma Bakɨme nɨma thɨgi kɨnigeni, mbe ramanin, niaŋ ndai.
5Guma tɨva mbatɨgar manin muun saŋ muunga, vhav mani kamthoonin kegi hɨv, panan mani ga kegi gumgi, mba vhav guigira mbe shigirim, mbe vhɨzgirga. Maaŋ muuŋgiap, guma the tɨva mbatɨgar manin muun saŋ, muunga, ana mba tɨvara muuŋgip, vhɨzgirga.
6Mani buip pɨnɨnga ŋkasŋka ki. Mani maaŋ kɨv, Fhe Bakɨme kamthooŋ gumgi nzuai mbugum, Fhe Bakɨme buni vhuuiŋ bun suanga tugir mbok nzigirga fhu. Mani vhɨra za mba pharar muuŋgirim, nta vɨzɨna gegɨrga ŋkasŋka ki. Mani vhɨra mbarkɨrga bigi mbatɨgir muuŋgirim, nta kha nuianan farfarga ŋkasŋka ki. Mani wani wo vuzvugar mba bigir muunga ŋkasŋka ki.
7Mani Fhe Bakɨme buni vhuuiŋ bun suanga ŋaarar muuŋgi thugɨrga, mba ruaŋruaŋgi sɨk mba khɨn kɨ kakagi mbok thav, kɨrar hɨrga. Ana kɨrar hɨgɨp, mani phorgɨp shogɨrga. Ana mani phorgɨp shogɨp, mani kambarav, mani shogirim, mani rimgirga.
8Ana mani shogirim, mani rimgirga, manin khumani ŋgu bakɨmen tuav bakɨme rɨgɨp kɨrga. Nza mba ŋgu bakɨme vhunama sav, khaŋ nzuai, Sodom o Idzɨp. Mbe mba ŋgu bakɨmera fhum mani Guma Bakɨme ndi khanarareŋ ga ntorgap, ana shogim, ana rimgi.
9Mba gumanin khumani maaŋ kɨrga, za kha nuianan ki ŋguir ki gumgi gu mbigi thari, gum za kha nuianan ki fhavi thari, za kha nuianan ki kaa thari, za kha nuianan ki ŋgui bakɨvir ki gumgi gu mbigi, mbe ra phuni khegene fɨgeŋ phorgɨp, mbe mani khumani ganɨnga. Mbe fhura gumgi thari ganɨrim, mbe mani khumani ndi mbogar tɨgɨrga fhu.
10Kha nuianan ki gumgi gu mbigi, mani rimgi ne suaŋv mani khumani ganɨv ndikndigɨrga. Mbe ndikndigɨp ŋgavir muuŋv, bigir vhuuin fhura wari won kɨvntogir nɨɨnga. Ne khaŋ muuŋgi, mba Fhe Bakɨmen kamthooŋ gumani, mani zaa mbatɨgar kha nuianan ki gumgi gu mbigi ga nɨɨŋgi.
11Mba ra phuni khegenen fɨgeŋ phorgap vhɨzgim, Fhe Bakɨme taagiap bɨɨŋbɨɨn mani ga nɨɨŋgim, mani taagia khavgia thɨgi. Mani taagia khavgia thɨgim, mba gumgi gu mbigi mani gangip guigira rɨrɨva mbatɨgar muuŋgirga.
12Mani khavgia thɨgap, guma kamthooŋ mbe mbararagim, ana Hevenan kav khɨrɨv, manin kaav khaŋ mani ga nzuai, “Ŋko khaŋ zɨv naaŋri.” Manin pana gumgi mani garav kim, mani vov, buiva vhen vergim, mba buip mani ndigap ndav, Hevenan ndagi.
13Mani Hevenan ndavra thagim, khɨmkhɨga bakɨ guarara mbuim, mba ŋgu bakɨmen fɨga mueŋ za mbatɨgim, mba ŋgun khaŋ muuŋgia mbur ki, fari bavera fethɨgi fɨgiveŋra mbur ki. Mba khɨmkhɨk muuŋgim, 7,000 gumgi gu mbigi vhɨzgi. Mba ki gumgi gu mbigi, mbe guigira rɨrɨva mbatɨga muuŋgiap, mbe kha Hevenan ki Fhe Bakɨme zɨ ndi vun kuamkuagi.
14Mba fharigi simtɨga bakɨmera thɨgi simtɨga bakɨme, ana hɨgap vhɨzgim, tuga tɨvaneŋra kegɨp, mba fharigi simtɨgani thɨgi simtɨga bakɨme, ana hɨrga.
15Mba harathɨgi enser won mbarɨva bim, gu mbararagim, mba Hevenan ki gumgi gu mbigi khɨrɨv kaav, khaŋ nzuai, “Nza Guma Bakɨme gum ana mba taagip won gumgi gu mbigi ndir zav suaŋgiap farasarigi guma, mani ntigem za kha nuiana gari ŋgui vhɨrve gari guman pana ŋkasŋkani ki. Nza Guma Bakɨme, ana ŋgui vhɨrve gari guman pan kɨv, ana zazera mbara muuŋgip kɨrga.”
16Mba gumgir pani, mbe Fhe Bakɨme nɨman wari won mpirmpirɨgi ga piigi, mbe zam wari wo thɨvi phɨrgiap, wari won ŋkoo ndi nuiana segap, Fhe Bakɨme rotu mbui.
17Mbe ana rotu mbuav khaŋ nzuai, “Guma Bakɨme, ndu Za Ŋkasŋka Bakɨme Ki Fhe Bakɨme ma. Ndu za kha bigi gari ŋkasŋka ki. Ndu ntige khar ki, ndu vhɨra fhum guarara ki. Ndu won ŋkasŋka bakɨme ndigap, ndu guigira ŋgui vhɨrve gari guman pan ki. Maaŋ muuŋgiap, nza ne nzuav ndun ndikndigap, ndu phorga nzuai.
18Mba Fhe Bakɨme khothɨgi fhuv gumgi gu mbigi, mbe guigira ndavi shigi. Ndu ntige wo ndav shirɨ bakɨme ndi khɨvɨrga tuk, ana ntige hɨgi. Ntigem, mba vhɨzgi gumgi gu mbigi, mbe ndu nɨma thivgirim, ndu mbe muuŋgi tɨvi ga suaŋv, mbe suanga tuk ma. Ntige vhɨra, ndu vheza vhuun won ŋaara gumgi ndun kamthooŋ gumgi, ndu mben nɨɨnga tuk ma. Ndu mben nɨɨŋv, ndu vhɨra won rɨvi gumgi gu mbigir nɨɨŋv, mba zɨ ki gumgi gu mbigir nɨɨŋv, mba zɨ ki fhu gumgi gu mbigi, ndu vhɨra vhezar mben nɨɨnga. Ndu kha nuiana farfagi gumgi, ndu ntigem, mben farfarga tuk ma.”
19Mba gumgir pani suaŋgim, Fhe Bakɨme enseri, mbe Hevenan Fhe Bakɨme Phena thɨma fhɨrgi. Mbe ana fhɨrgiap, garim, Fhe Bakɨme Suaŋgi Kaman Vureŋ Ki Kovsɨk, ana phena vhen kɨrara ndarav ki. Mba buip vhekvhegap, fhura shɨkshɨga ndogi, khɨkhɨɨ bakɨvi him, buip phɨrerim, khɨmkhɨk kha nuianan him, mbok ais fara muuŋgiap nzi.
