Psalms 86:8-16

⁸O Kari Biya, kaem kasik la nunga ningi mu bo ta nika iwita mena; nika kiwem mu kiwem suen la nunga kia saparam.

⁹Sor kasik la ni nunga nungem mu taimon ale ni kema te nip patawumonko; nuna nika nip nikim garagar mu patawumonko.

¹⁰Mu awuk, ni keta ni biya se ni kiwem yawara duap duap nunguningkiri betesam; ni keta suanta ni Kaem.

¹¹O Yawe, nika kiwem aga kasuru se ani nika kiwem diram la karo tui se lagarikko; angamang motam suanta awur se ani ni keta suanta ka bowa ningi baga se lagarikko.

¹²O Kari Biya, ni aninga Kaem, ani angamang motam lilim la te ka nip biya patawurikko; ani nika nip biya pempem la balu se lagarikko.

¹³Mu awuk, nika kua ani aisa mu kalel biya; ni ani kuera ko mutim ningi iwita wore aga patawu taem.

¹⁴O Kaem, nunumi patawura ko kari alo agarak barimasan; nuna ilu biguwuman ale aninga momon se kuerikko; nuna ni mel yam ko ka betesan.

¹⁵Bare Kari Biya, ni mu gemang bataga se gemang lila ko Kaem, ni gemang tairate me magoso; se ni ninguru nanga kuesam ale gemang nangara nunguning nangarsam.

¹⁶Buta se kema gurugu ale gemang aisuko; ani nika ura kari, nika ura imet bo ko namar, se aga bataguru to ale sokel aisuko.