Psalms 79:3-12

³Nika kariimet nunga gue mu yu iwita kaparam ale Jerusalem likilim aram, se kariimet bo kariimet kuera mu nunga mutim tugumokko me ta bagoso.

⁴Se sor saki nangimik duap te bagara mu nago ko den dolara balsan, ale nanga gusirsan.

⁵O Yawe, ni butata ana nago ko gemang maga se lagarukko e? Nika gemang magara butata tama iwita kani se lagarukko e?

⁶Nika gemang magara sumu gurugu se, sor wonong nika nip me patawu se, nikate guranek me bitawara, wore nongote namarukko.

⁷Mu awuk, nuna Jacob ko gue te tairam mu nunga moman se kua sapaman, se nunga sor wonong maga saparam.

⁸Ana nanga taleng girigir alo nunga memek koma me nangaruko; ana nago ko neman bataguk se gemang nangaruko; mu awuk, ana nanga ikia menaram se nangamang motam dagulu parasaram.

⁹O Kaem, ni nanga sangaru toko! Keta ka nip biya ko ningo mu ko se, nanga bataguru to ale nanga memek siwu nangaruko.

¹⁰Sor saki ko kariimet nanga isarsan, “Nenenga Kaem apoko ya?” ma balsan mu me terong! Nika ura kari nunga gue kaparam mu ko koma bu nungumik kuali bitar se ana ariginakko.

¹¹Ana nanga kariimet saki talipara ningi baga se niasan kikisan wore nunga niara ikiko! Nuna uwutata baga kuemonko bagasan; se nika sokel aora biya wore te nunga bataguru toko!

¹²O Kari Biya, sor saki nunga bala memek ni kimik kuali beteman mu ko koma tom 7 ko iwita nungaruko!