Psalms 78:7-61

⁷Nuna uwuta betemon mu asele, kuriang luan udagi mu Kaem ko nongomang ningi nunguning aruk, se nuna nu mel bibiya nungam mu me ta ko nungamili saparuk, se ko munan den kasik la mu karo tumonko.

⁸Nuna nunga taleng girigir alo nusupuling lagakaso iwita me bagamonko. Taleng girigir alo mu noko den sawarukasan ale noko nongomang ningi me nunguning akaso, se ko den me karo tuikasan.

⁹Ephraim digo mu gatu mare karogo, bare kager barasam mu nuna nagu sapaman.

¹⁰Kaem den nongorak kaolam mu me karo tuman, ale ko munan den mu karo tumonko nongomang me anikaso.

¹¹Nuna munan bibiya nu beteram mu ko nungamili saparam, ale kiwem bibiya nongoma te beteram mu karogo ko nungamili saparam.

¹²Nu garuk nomotam te kiwem bibiya duap duap bitakaso; kiwem mu ali sor Egypt se kuwim Zoan mu te bitakaso.

¹³Kaem gagi pagaru ilagala awuram, duruk iwita koma singsang awuram, ale Israel nongorak kusumuri tairam.

¹⁴Kowarkalal mu taiti nuwi ningi baga se taiti nuwi iwita girikaso; ale tirom mu tama nikim iwita kanikaso ale girikaso.

¹⁵Nu sor maraka garagarayam te manga pakakumukaso se yu kapakaso se nokasan ale yu ko me tukunangakasan.

¹⁶Nu nungam se yu gotek bo manga ningi bausam, ale yu biya bo iwita naguram koropong kaoram ale kaparam.

¹⁷Bare nuna Kaem Kalel Biya mu koma te memek tawun biya bitakasan; nuna sor maraka te baga se nusupuling lagakaso.

¹⁸Nuna ko iki se wore Kaem ira ariga te bitakasan; nuna na ko kuakasan ale na nungarukko sail te ko balukasan.

¹⁹Nuna Kaem ilak barimakasan ale balukasan, “Kaem pa sor maraka iwita te inang suen biya nangarukko terong agi?” makasan.

²⁰“Nu manga moram se yu biya aratam. Bare aitak awuk? Nu inang daro ko yaman ago mu nangarukko terong?”

²¹Se tom Yawe umu ikiam mu gomang magaram, se tama beteram se Jacob ko kariimet nongote tai kaparam, ale gomang magara tawun biya Israel ko magaram.

²²Nuna munan mu Kaem kote bitakasan, mu awuk, nuna noko nongomang ningi me nunguning akaso se nu me nunga sangukko iwita ikikasan.

²³Bare nu umu ko iki se wore taiti gomang sail ago maonam ale taiti gomang ko songkuring kaogam.

²⁴Ale inang manna mu tuwik iwita beteram se namonko kaparam; nu duruk wonong ko inang imi namonko nungaram.

²⁵Se imi mu engel nunga inang wore nuna naman; nu inang suen biya nungaram se naman.

²⁶Se udagi aking balam se koma worem bausa mu te marir barasam, ale ko sokel aora biya mu te balam se yar daula barasam.

²⁷Ale inangnang beteram se tuwik muguri iwita kaparam ale kupkup iwita ali bala tuam, mu inangnang suen biya nunguningkiri saun muguri iwita kapaman.

²⁸Te kuwim taman ale bagakasan mu te nu inangnang waram se kaparam ale sasal suen la duap te sor magaram.

²⁹Se kariimet ninguru naman ale nungumik karogo terong ma saparam; mel ko kueman mu Kaem nungaram.

³⁰Bare inang mu yam aitak nowaman, inang nuguring ningi yam aniram se,

³¹Kaem gomang magaram se nunga kari kulak sokel ago mu nunga moram se kueman, mu kari umu Israel ko kari ningo ningo.

³²Kaem kiwem bibiya duap duap nungurukaso ta wore, kariimet nongomang ningi me nunguning akaso, se memek yam bitawakasan.

³³Buta se nu am motam la nungarkiwakaso se nuna nguangara ago aolak ilukasan, ale ko ningo nuam bo me arigiman, am nama kua namakasan.

³⁴Tom Kaem sang nunga moakaso se kuakasan, asele sang nongomang gurugukasan ale kote pila taikasan ale sail karogo kote guranek bitakasan.

³⁵Aitak nungamin ares mam se ko ikiman, Kaem mu nononga Manga Gek am, Kaem Kalel Biya mu nunga Saonga Kari.

³⁶Bare mu kawelakasan, nuguring guang la balukasan, ale kawel te nungamili gurugu patawukasan.

³⁷Nuna nongomang motam ningi nunguning te me karo tuikasan, ale den nongorak kaolam mu diram la me karo tuman.

³⁸Bare Kaem ko noman bataga nononga ko wore te se, nunga memek siwukaso ale me nunga maguwukaso. Tom suen biya noko gomang magara mu am irakaso se kapakaso, se me nunga maguwukaso.

³⁹Nu ikikaso mu nuna ali ewere ko kariimet; nuna marir taiso ale nama mena namoso iwita, tom tukunangta baga mena namamonko.

⁴⁰Nuna sor merang mu te baga se tom suen biya nusupuling lagakaso; se sor garagarayam mu te baga se gomang motam maguwukasan.

⁴¹Nuna Kaem ira ariga ko munan mu me ta bita to arikasan, ale Israel ko Kaem Laili mu gomang maguwukasan.

⁴²Nuna noko sokel aora garagar mu ko nungamin me ta ares makaso, se tom nu kari memek nuguting te nunga bataguru tam mu ko nungamili saparam tala.

⁴³Nu Egypt sor mu te kiwem bibiya duap duap beteram, ale Zoan sor ningi kausa beteram mu ko nungamin me ares makaso.

⁴⁴Nu sor umu te nunga yu gurugam se gue ko aram, se kariimet umu nunga yu namonko me terong.

⁴⁵Nu kuwuling beteram se nunga nokaso, se gorogoro beteram se nunga daiga bagara maguwukaso.

⁴⁶Nu yes memek se usiska kurumurum beteram, se nunga ningam ningi tam gawa suen la no sapaman.

⁴⁷Nu tuwik muguri bibiya mu beteram se tai kaparam ale nunga tam waen se nunga tam fig maguwu saparam.

⁴⁸Nu tuwik biya bo, muguri bibiya, wore beteram se kaparam se nunga bulmakau kua sapaman; pure nikim te nunga sipsip anapeya maguwu saparam se kueman tala.

⁴⁹Nu ninguru gomang magaram se ninguru nunga maguwuram; se ko gomang memek mu kuera mateng ko engel alo kariimet nunga maguwu kam, nunga maguwuram.

⁵⁰Nu nogo ko gomang magaram se me nongorak kolaram, mena; nu kuera biya bo beteram se tai kaparam se karogo ngual ngual kueman.

⁵¹Nu Egypt nunga kuriang gira bilangara mu nunga moram se kua sapaman; kuriang kari, kari ko gue kuagi, Ham ko gue te, mu nunga maguwuram.

⁵²Bare nu ko kariimet mu sipsip iwita nunga giam, ale sor garagarayam mu te lage nunga kausam.

⁵³Nu nunga giam ale nunga bitaru se nongorak namakaso se me nguangakasan; bare nunga kager kari memek mu gagi biya tairam ale nunga ira kaluwuram.

⁵⁴Nu nunga giam nongorak tai kota ko duruk laili mu te aratam, sor duruk ali mu nu kota ko sail te bataguru tam.

⁵⁵Nu kariimet iwareng giriman ale ali umu te bagaman mu nunga kaoram, ale ali mu pakakumu Israel kariimet nungaram; ale digo digo te kuwim nungaram se te dagiman.

⁵⁶Bare Israel kariimet aking Kaem Kalel Biya mu ira ariga te bitakasan ale ilak nusupuling lagakaso; nuna ko munan den me karo tuikasan.

⁵⁷Nuna kiwem girakala nunga taleng girigir alo bitakasan iwitatala, nuna nusupuling lagakaso se Kaem kuring kulukurukasan; mare pateweteng se tagira mu me diram namaruk iwita bitakasan.

⁵⁸Nuna kaem kawel nunga tama betera kuwim kalokasan, se Kaem gomang ninguru magakaso; ale nunga kaem kawel umu te Kaem gomang motam maguwukasan.

⁵⁹Kaem nunga kiwem ewere arigam mu nu gomang ninguru magaram, se buring lilim la gurugu ko kariimet Israel nungaram.

⁶⁰Ale ko sasal Shiloh mu betela buring tuam, noko sasal mu kariimet nunga wonong kusumuri anikaso wore beteram.

⁶¹Ale yam kager kari memek nungarkiwaram se noko Kunup Laili mu gi ago nama gilingiman; Kunup umu noko nup biya se ko nikim nunga kasurukaso.